Փաստ ինֆո

ԱՄՆ նախագահ Ջո Բայդենի կողմից ցեղասպանություն տերմինի օգտագործումը քաղաքական ուղերձ էր։ Ըստ էության գործ ունենք Թուրքիայի վրա լրացուցիչ ճնշում գործադրելու քաղաքականության հետ։ «Փաստինֆո»-ի հետ զրույցում այս մասին ասաց իրանագետ Վարդան Ոսկանյանը։

Իրանագետի խոսքով հարցը բավական նուրբ է, քանի որ այսօր առնվազն Արցախում հայ բնակչության անվտանգությունը և հնարավոր ցեղասպանության կանխումն իրականացնում են ռուսական սահմանապահ զորքերը։ Վարդան Ոսկանյանը նկատում է՝ այս համատեքստում պետք է չափազանց ուշադիր և նուրբ քաղաքականություն վարել, որպեսզի կարողանանք հավասարակշռել մի կողմից ԱՄՆ-ի ճնշումը Թուրքիայի վրա, իսկ մյուս կողմից ռուսական ներկայությունը տարածաշրջանում, որպեսզի Հայաստանը չհայտնվի ռուս-ամերիկյան բախման կիզակետում։

Անդրադառնալով տեսակետին, որ Ջո Բայդենի կողմից այդ տերմինի օգտագործումը վարչապետի պաշտոնակատարը հնարավոր է քարոզարշավի ժամանակ օգտագործի որպես իրենց իշխանության ձեռքբերում, Վարդան Ոսկանյանն ասաց. «Այս վարչախմբից որևէ բան ակնկալելը տեղին չէ, բայց քարոզարշավի ժամանակ դա կօգտագործվի։ Ստի և կեղծիքի քարոզչամեքենայի զանազան գործիքակազմեր կան, որոնք տարբեր վերնագրերի միջոցով կփորձեն դա օգտագործել՝ ցույց տալու համար, թե իբր վարչապետի պաշտոնը զբաղեցնող անձն է այն հիմնական գործող կողմը, որը «ստիպել է» ԱՄՆ-ին ճանաչել Հայոց ցեղասպանությունը, բայց կարծում եմ՝ դա որևէ տրամաբանող ընտրողի վրա չի կարող ազդեցություն թողնել: Այժմ մեր հասարակության շատ մեծ հատված մոլորությունից դուրս է եկել, և այդ ամբողջ գործընթացն անցկացնում է սեփական տրամաբանության պրիզմայով»։

Հարցին՝ արդյոք նման հաջողություններն օգտագործելով և հայ-թուրքական հարաբերությունների վերաբերյալ իրենց դիրքորոշումը ժամանակավորապես փոխելով չե՞ն կարողանա ընտրություններում լուրջ հաջողության հասնել, իրանագետը նկատեց՝ թեև հասարակության դիրքորոշումը ստիպում է այս վարչախմբին Թուրքիայի հետ կապված իր հռետորաբանությունը փոխել, բայց դրանից նրանց ներքին համոզմունքն ամենևին չի փոխվում. «Նրանք Թուրքիայի հետ վասալական հարաբերությունների կողմնակից են։ Հաշվի առնելով մեր հասարակության տրամադրությունները՝ փորձ են կատարում շեղվել դեպի ազգային, հայրենասիրական դաշտ։ Կարծում եմ՝ հասարակությունը պետք է զգոն գտնվի և, ըստ էության, բոլոր քաղաքական ուժերին դատի ոչ թե խոսքերով, այլ գործերով։ Ակնհայտ է, որ ներկայիս վարչախումբն իրեն արդեն ցույց է տվել որպես Հայաստանի պետական շահերի հետ որևէ առնչություն չունեցող և այդ շահերը ոտնահարող խումբ»,-նշեց իրանագետը։

Վարդան Ոսկանյանը կարծում է, որ գործող իշխանությունը ստի ու կեղծիքի մեթոդաբանությամբ, պոպուլիստական հայտարարություններով փորձելու է շեղել հասարակության ուշադրությունն իրենց բնույթից։ Նրանք փորձելու են իրենց ցույց տալ որպես հայ ժողովրդի և պետականության մասին մտածող անձինք, ինչն իրանագետի համոզմամբ իրականության հետ որևէ աղերս չունի։

Այդուհանդերձ, նա գտնում է, որ ներկայիս վարչախմբի մի հատվածը կգնա հակառուսական տրամադրությունների դաշտով, ինչը Հայաստանի համար խիստ վտանգավոր է. «Պարադոքս է, որ անգամ հակառուսական դիրքորոշում ունենալով հանդերձ՝ նրանք չեն կարողանում նորմալ հարաբերություններ պահպանել նույնիսկ ԱՄՆ-ի հետ, հետևաբար այս համատեքստում ակնհայտ է, որ գործ ունենք ապաշնորհ կառավարիչների հետ»,-նշեց իրանագետը։

Վերջինս ընդգծեց՝ թեև որևէ մեկը չի կարող հստակ կանխատեսել, թե ինչպիսին կլինի ընտրությունների ընթացքը, սակայն միանշանակ է, որ այս վարչախմբին չի հաջողվի ձայների մեծամասնություն հավաքել. «Ընտրություն կատարելուց առաջ ընտրողը պետք է շատ լուրջ մտածի՝ արդյոք ճիշտ է քվեն տալ այն վարչախմբին, որն իրեն խաբել է, որը Հայաստանը տարել է պարտության, ոչնչացրել է պետական ինստիտուտները, զրոյացրել ՀՀ-ի սուբյեկտայինությունը, և որը ջախջախման է տարել մեր փառապանծ բանակը, այն բանակը, որը տարածաշրջանում իրոք լավագույնն է»,-ամփոփեց Վարդան Ոսկանյանը։

Աղբյուր` Փաստինֆո