Փաստ ինֆո

Առավոտից սկսվեցին ճնշումներ, հայտարարություններ, կոչեր առ այն, որ, եթե խորհրդարանական ընդդիմադիր ուժերը թեկնածու չառաջադրեն և չկանխեն ընտրությունները, ուրեմն դավաճան են: Այս մասին ֆեյսբուքյան ուղիղ եթերում ասաց ԱԺ «Լուսավոր Հայաստան» խմբակցության ղեկավար Էդմոն Մարուքյանը:

Պատգամավորը նկատեց նոյեմբերի 10-ից Հայաստանը գտնվում է ներքաղաքական խորը ճգնաժամի մեջ է, որին գումարվել է հետպատերազմական հումանիտար ճգնաժամը։

«Այս ճգնաժամերի լուծման համար երկար բանակցություններից հետո գնացել ենք զիջումների եւ այդ զիջումների արդյունքում կա համաձայնություն, որ հունիսի 20-ին պետք է լինեն արտահերթ խորհրդարանական ընտրություններ: Երբ այդ համաձայնությունը ձեռք բերվեց, սկսեցին ասել, թե դա տեղի չի ունենա, որովհետեւ վարչապետը հրաժարական չի տա, պայմանավորվածությունները կխախտվեն եւ ընտրություններ չեն լինի: Ասացինք՝ ոչինչ չի բացառվում քաղաքականության մեջ, բայց պայմանավորվել ենք, հույս ունենք, որ տեղի կունենա, որից հետո սկսվեց քարոզչական արշավ, որ պետք չեն ընտրություններ, բայց ինչ է պետք՝ պարզ չի, որովհետեւ այլ մեթոդով քաղաքական խնդիրները չեն լուծվել մինչեւ ընտրությունների համաձայնությունը:

Այսօր վարչապետը տվեց հրաժարական, նախագահը ստորագրեց հրամանագիրը: Սա նշանակում է, որ սկսվում է խորհրդարանի արձակման գործընթացը: Առավոտից սկսվեցին ճնշումներ, հայտարարություններ, կոչեր առ այն, որ, եթե խորհրդարանական ընդդիմադիր ուժերը թեկնածու չառաջադրեն եւ չկանխեն ընտրությունները, ուրեմն դավաճան են:

Մենք պայմանավորվել ենք, որ լինելու են արտահերթ ընտրություններ, եւ չենք խոչընդոտելու այդ նպատակով խորհրդարանի արձակմանը: Ինչի՞ համար են այդ կոչերը, որ ընտրություններ պետք չեն: Երբ հայտարարեցին, որ չեն լինելու ընտրություններ, բոլորն ասացին՝ վախեցան, հիմա համոզեցինք, բանակցեցինք, ասում են՝ ընտրություններ պետք չեն: Ուզում եմ պաշտոնապես հայտարարել՝ ոչ մի ճնշում չի աշխատելու մեզ վրա, մենք դա 2018 թվականին ենք ցույց տվել եւ ոչ մի ավանտյուրայի մենք չենք գնալու»,- ասաց նա ֆեյսբուքյան լայվում:

Էդմոն Մարուքյանն ընդգծեց այս ընտրությունները նրա համար են, որ դուրս գան այս հին ցիկլից, որովհետեւ բոլորը, այդ թվում՝ գործող իշխանությունը հին են, եւ պետք է փոխել այդ իշխանությունը:

«Մենք չենք գնում ընտրությունների, որ աջակցենք, որ գործող իշխանությունը վերընտրվի, եւ որեւէ ձեւով չենք աջակցելու, որ Ռոբերտ Քոչարյանը կամ որեւէ մեկը նախկին համակագից գա եւ դառնա վարչապետ: Քաղաքական ճգնաժամը հաղթահարելու բոլոր մնացած մեթոդները փորձարկվել են անցած 6 ամսվա ընթացքում: Եւ ասում են՝ պետք է դիմել Սահմանադրական դատարան, որ Նիկոլ Փաշինյանը չլինի վարչապետի ժ/պ, իսկ ի՞նչ տարբերություն՝ Նիկոլ Փաշինյանը կլինի, թե Տիգրան Ավինյանը: 2018 թվականին ինչո՞ւ այս հարցը չվիճարկվեց»,- նշեց նա:

Աղբյուր` Փաստինֆո