Փաստ ինֆո

«Սուգը հավերժ է, եթե պայքար չկա»։ Դրանով ամեն ինչ ասված է։ Մենք պայքարը պետք է տեղափոխենք ներքին դաշտ՝ երկիրը և երկրի անհատները, համայնքները, մարզերը, պետությունը, բանակը տնտեսությունը պետք է ուժեղանա։ Անցախ 30 տարիներում, բազմաթիվ թերություններով հանդերձ, ունեցանք կայացած պետություն, կայացած բանակ, պետական, իրավապահ համակարգ, որը 2018թ իրադարձություններից հետո ցնցումներին տեղի չտվեց, դիմացավ։ Այս մասին լրագրողների հետ զրույցում ասաց Մեղրիի քաղաքապետ Մխիթար Զաքարյանը։

Նրա խոսքով՝ իներցիայով երեք տարի այդ իրավապահ համակարգը դեռևս շարունակում է կանգուն մնալ, բայց իներցիան ժամանակի ընթացքում կորչում է և այժմ եկել է ժամանակը նոր իմպուլսի՝ հաշվի առնելով նաև անցյալի սխալները, պետք է եզրակացություններ անել և առաջ շարժվել։

Ինչ վերաբերում է տնտեսության զարգացման համար տարածաշրջանում ճանապարհ տալուն, Զաքարյանը նշեց, որ ոչինչ բացառել պետք չէ, բայց այդ հարցերի պատասխանները կստանան, երբ ունենանք ուժեղ պետություն, ուժեղ կառավարություն, ուժեղ իշխանություն, բայց այս իրավիճակում երկկողմ կամ եռակողմ հարաբերություններում հայկական շահերը ներկայացնող չի տեսնում, ինչ-որ անհասկալանի հարցերով դիմում են ՌԴ-ին։

Ինչ վերաբերում է Ալիևի հայտարարությանը, թե Զանգեզուրի միջանցք չտրվելու դեպքում ուժով կտիրանա, Զաքարյանը նշեց, որ կյանքը ցույց տվեց, որ ոչ վաղ անցյալում ինչ ասել՝ արել է, այդ հայտարարությանը պետք է լուրջ մոտենալ, եզրակացություններ անել և պատրաստվել դրան։

Դիտարկմանը, որ Սյունիքում շատ քիչ ճանապարհ է բաժանում թուրքերից, Երևանում այդքան էլ չունենք այդ գիտակցումը, Մեղրիի քաղաքապետն արձագանքեց՝ նշելով, որ որպես այդպիսին բաժանող էլ չկա։

«Դուք տեսաք այս վարչապետի աթոռը զբաղեցնողի այցը՝ Սյունիք, 27 կմ իրեն ուղեկցում էին ռուս խաղաղապահները, այդքանով ամեն ինչ ասված է»,- նշեց նա։

Հարցին՝ ով է ապահովում իր սյունեցիների անվտանգությունը, Զաքարյանը նշեց. «Մեր այդտեղով անցնելը ևս խորհրդանշական է։ Մեզ ոչ ոք չի ուղեկցում և պետք էլ չի ուղեկցի։ Մեր հայրենիքով շարժվելուց մենք պաշտպանության կարիք չենք զգում»։
Անդրադառնալով Սյունիքում տեղի ունեցած ակցիաների վերաբերյալ քրեական գործին՝ Զաքարյանը նշեց, որ քրեական գործի մասին պաշտպաններն ավելի հանգամանալից կարող են ներկայացնել. «Կարող եմ ասել, որ այդ գործի հետ կապ ունեմ այնքանով, ինչքանով՝ Դուք»։

Հարցին՝ իրավապահ համակարգի ներկայացուցիչներն իրենց ինչպես են պահել՝ հաշվի առնելով տարածված տեսանյութերը, Զաքարյանը նշեց, որ հետագայում կանդրադառնան, ապագայի հարց է, գոյություն ունի ՀՔԾ և հույս ունի, որ ժամանակի ընթացքում բոլոր իրադարձությունները հանգամանալից քննության առարկա կդառնան և կտրվեն պատասխաններ։

Աղբյուր` Փաստինֆո