Փաստ ինֆո

Այսօրվա դրությամբ՝ ՀՀ իշխանությունները շարունակում են ժխտողական քաղաքականությունը, այսինքն՝ հանդիսանում են թուրքական քաղաքականության ուղենիշների իրականացնողները ՀՀ-ում և Թուրքիային հաջողվել է 106 տարի անց ձեռք բերել այնպիսի կառավարություն, որը կշարունակի իր՝ Թուրքիայի քաղաքականությունը։ Դա է մեր մեղավորությունը, որ այսօր Թուրքիային հաջողվել է բերել Հայաստանի ղեկին մարդու, որը շարունակում է թուրքական քաղաքականությունը։ Այս մասին «Փաստինֆո»-ի թղթակցի հետ զրույցում ասաց Լիլիթ Թումանյանը։ 

Թումանյանը մեջբերեց Մովսես Գորգիսյանի խոսքերը՝ նշելով, որ քանի դեռ չկա պայքար, սուգը հավերժ է և այսօր այդ խոսքերը խիստ արդիական են։

«Եթե մենք պետք է շարունակենք նույն հոգեբանությամբ, որը տիրել է 106 տարի առաջ, երբ մարդիկ չէին հավատում, որ իրենց հետ կարող է տեղի ունենալ այն, ինչ տեղի ունեցավ, որովհետև փորձում էին ապրել հաշտ, ներդաշնակ, հարևանաբար, փորձում էին Թուրքիային ընկալել որպես խաղաղասեր, քաղաքակիրթ և դա բերեց Ցեղասպանության։ Այսօր մենք շարունակում ենք նույն ձևով, մեզ փորձում են բերել նույն հոգեբանության և սա նախացեղասպանային հոգեբանություն է»,- նշեց նա՝ հավելելով, որ մենք կորցնում ենք մեր դիմադրողականությունը, զգոնությունը, թույլ ենք տալիս, որ մեր ուղեղները ողողեն և լվան, սա է մեր հիմնական մեղավորությունը և հենց դրա դեմ պետք է պայքարել։

Նրա խոսքով՝ պետք է պայքարել ոչ թե անձանց դեմ, որոնք տանում են այդ քաղաքականությունը, այլ՝ ինքներս մեր դեմ, պետք է վերանանք կեղծ խաղաղասիրությունից, որովհետև իրական խաղաղասիրությունը բռունցքով է, պինդ բանակով է, ուժեղ ռազմական բաղադրիչով է, իրավական բաղադրիչով է։

Դիտարկմանը, որ հասարակությունը սպասում է, որ աշխարհը պետք է ճանաչի Հայոց Ցեղասպանությունը և տպավորություն է, որ աշխարհն է մեղավոր, Թումանյանն արձագանքեց՝ նշելով, որ աշխարհը նույնպես մեղավոր է, որովհետև ինչպես լռակյաց համաձայնությամբ 106 տարի առաջ տեղի ունեցավ Ցեղասպանություն, նույն ձևով մեղավոր են բոլոր այն երկրները, որոնք մինչ օրս չեն ճանաչել Հայոց Ցեղասպանությունը և չեն դատապարտել, մեղավոր են այն երկրները, որոնք չեն դատապարտել Ադրբեջանի ուժի կիրառումը՝ Արցախյան վերջին պատերազմում։

«Մեղավոր են, բայց իրավիճակը շտկելու համար ի՞նչ ենք անում մենք։ ՀՀ կառավարությունը, պետության ներկայացուցիչները ինչ են անում, որ դա չլինի այդպես, արդյոք ձեռնարկվում են բգոլոր անհրաժեշտ քայլերը, որ մեղադրեն՝ դե չեն ճանաչում»,- նշեց նա՝ հավելելով, որ բոլոր պրոցեսները շրջելի են, անդառնալիության կետը դեռ չենք անցել։

Աղբյուր` Փաստինֆո