Փաստ ինֆո

Մենք դեմ չենք հայ-թուրքական հարաբերություններին, բայց խնդիրը հետևյալն է՝ ինչի՞ հաշվին: Եթե այդ հարաբերությունները հաստատվելու են Ցեղասպանության ուրացման հաշվին, ապա մենք դեմ ենք այդ հարաբերություններին, և ամեն ինչ անելու ենք, որ նման հարաբերություններ չլինեն: Այս մասին լրագրողների հետ զրույցում ասաց ՀՅԴ ԳՄ ներկայացուցիչ Իշխան Սաղաթելյանը.

«Եթե Թուրքիան ուզում է Հայաստանի հետ ունենա հարաբերություններ, բացի սահմանը՝ ի ուրացում ցեղասպանության, մենք դեմ ենք լինելու դրան և ամեն ինչ անելու ենք դրա դեմ:Իսկ այսօրվա իշխանությունները պատրաստ են ամեն ինչ ուրանալ, նրանք ծնկի են եկել թուրքերի առջև »,-ասաց Իշխան Սաղաթելյանը:

Նա հերքեց Հայկական ժամանակ լրատվամիջոցի տարածած տեղեկատվությունը, թե ՀՅԴ երիտասարդները պատրաստվում են առավոտյան խոչընդոտել Նիկոլ Փաշինյանի մուտքը Ծիծեռնակաբերդ.

«Դա իրենց հերթական ապատեղեկատվությունն է: Ես գտնում եմ Նիկոլ Փաշինյանն արժանի չէ այցելել Ցեղասպանության հուշարձան, բայց մենք չենք գնա իրեն արգելելու ճանապարհով, զուտ նրա համար, որ վաղը մեզ համար խորհրդանշական օր է»,-ասաց Սաղաթելյանը:

Վերջինիս խոսքով՝ գործող իշխանությունը վաղուց չի սպասարկում Հայաստանի շահերը.

«Այն պարագայում, երբ ընդամենը վեց ամիս առաջ կոտորել են մեր ժողովրդին, նվաճել են մեր հայրենիքի մի զգալի և կարևոր մասը, ունենք անհետ կորածներ, վիրավորների վերքերը չեն չորացել, կարո՞ղ եք բացատրել, իշխանությունները Հայաստանում ինչու՞ են թուրքասիրության քարոզ անում: Այն երկրները, որոնք կոտորել են մեզ, մեր իշխանությունները ասում են՝ իրենք մեր թշնամից չեն: Բա թշնամի չեն, ի՞նչ են, բարեկամ են»,-ասաց Սաղաթելյանը:

Աղբյուր` Փաստինֆո