Փաստ ինֆո

Հասկանալի էր, որ երբ Նիկոլ Փաշինյանին չընդունեցին Սյունիքում և արդարացիորեն իրենց բողոքն արտահայտեցին, դրան հաջորդեց քաղաքական հաշվեհարդար։ Լրագրողների հետ զրույցի ժամանակ այս մասին ասաց ԱԺ անկախ պատգամավոր Աննա Գրիգորյանը, ով այս պահին նույնպես դատարանի բակում է։

Հիշեցնենք, որ Երևանի ընդհանուր իրավասության դատարանը քննում է Մեղրիի համայնքապետ Մխիթար Զաքարյանին ձերբակալելու որոշման դեմ բողոքը։

Պատգամավորի խոսքով այս գործն իրավական առումով ոչ մի հենք չունի. «Մարդուն խուլիգանության մեջ են մեղադրում այն դեպքում, երբ նա իջել է բնակիչների մոտ, փորձել հասկանալ ինչ է կատարվում և կանխել հնարավոր բախումները։ Այս մարդկանց նկատմամբ բացառապես քաղաքական հետապնդում է, որն ուղեկցվում է ստորացումներով, անհամաչափ ուժի կիրառմամբ։ Սա պետք է բոլորի կողմից դատապարտելի լինի»,-ասաց Աննա Գրիգորյանը։

Դիտարկմանը, որ իշխանության ներկայացուցիչները պնդում են՝ սյունեցիները խուլիգանություն են արել և նրանց պետք է այդկերպ ստորացնեն, Աննա Գրիգորյանն ասաց. «Ինձ համար այնքան տարօրինակ է, երբ երկրի ղեկավարը մի մարզ է գնում, ասում՝ խոնարհվում է իրենց առաջ, ինչին ծափահարություններ են հաջորդում, բայց երբ մեկ այլ մարզ է գնում, որտեղ բողոք են արտահայտում, երկրի ղեկավարը նրանց խուլիգան է համարում։ Նրանք նույն ժողովուրդն են, այդ մարդիկ ՀՀ քաղաքացիներն են, այդ ի/նչ որակումներ են։ Ե՛վ երկրի ղեկավարը, և՛ իշխանության այլ ներկայացուցիչներ պետք է շատ ավելի մեծ հարգանք ցուցաբերեն ՀՀ քաղաքացիների նկատմամբ»,-նշեց պատգամավորը։

Վերջինս ընդգծեց՝ մեր սահմաններն այսօր անվտանգ չեն, քանի որ այնտեղ դեռևս չեն կանգնում հայ սահմանապահները. «Առանձին կետեր կան, բայց հենակետերը բավարար չափով չեն, որպեսզի ապահովեն աբողջ անվտանգությունը։ Այնտեղ իհարկե կան նաև ռուս խաղաղապահներ, բայց ի՞նչ է ստացվում, որ ՀՀ-ն իր ձեռքերը ծալած է նստում, խոսում բանակի մասին անհայտ ձևակերպումներով և հույսն ամբողջությամբ դրել է Ռուսաստանի վրա։ ՀՀ քաղաքացին հստակ պահանջներ ունի և համապատասխան վերաբերմունք է ակնկալում սեփական անձի անվտանգության վերաբերյալ»,-ասաց պատգամավորը։

Աղբյուր` Փաստինֆո