Փաստ ինֆո

Մենք օրինապաշտ մարդիկ ենք։ Բնակիչներն իրենց օբյեկտիվ բողոքի ձայնն են բարձրացրել։ «Փաստինֆո»-ի հետ զրույցում ասաց Քաջարանի համայնքապետ Մանվել Փարամազյանը՝ անդրադառնալով վարչապետի Սյունիք այցից հետո մի շարք սյունեցիների բերման ենթարկելու գործողություններին։

«Այսօր օրենքի առաջ բոլորն էլ հավասար են։ Սյունեցիներն օրինապաշտ են, նրանք ընդամենն իրենց բողոքն են արտահայտել»,-նշեց Քաջարանի համայնքապետը։

Անդրադառնալով առկա տեսակետներին, որ իշխանությունները պատրաստվում են Մեղրիի միջանցքի փաստաթղթի ստորագրմանը և այսկերպ փորձում են Սյունիքի ակտիվիստներին չեզոքացնել, Մանվել Փարամազյանը նկատեց՝ Սյունիքը մի քանի ակտիվիստով չի պայմանավորված, այնտեղ բոլորն էլ գիտակից մարդիկ են և շատ լավ են հասկանում՝ ինչ է կատարվում. «Սյունիքը տեղով մեկ ակտիվ է։ Չեմ կարծում, որ մի քանի հոգու չեզոքացնելով՝ դաշտը կարող են մաքրել»,-նշեց համայնքապետը։

Վերջինս նկատեց՝ համայնքապետերին ձերբակալելով էլ ավելի կթեժացնեն գործընթացները, քանի որ նրանք ժողովրդի հարգանքն են վայելում, և մարդիկ չեն կարող անտարբեր լինել այս ամենի նկատմամբ. «Համոզված եմ, որ ավելի շատ կգրգռեն այս պրոցեսները, եթե իշխանությունը նման քայլեր անի։ Միանշանակ այլ արձագանք է լինելու։ Չեմ ասում, որ ժողովուրդը պետք է թուր ու թվանք վերցնի, դուրս գա փողոցներ։ Ո՛չ, Սյունիքում մարդիկ գիտակից են և շատ լավ են հասկանում այս իրավիճակը։ Եթե ժամանակին կասկածանքով էին մոտենում այս հարցերին, հիմա համոզված են, դրա համար էլ ասում են, որ չեն կարող ձեռքերը ծալած նստել ու նայել»,-ասաց Մանվել Փարամազյանը։

Անդրադառնալով հարցին՝ արդյոք այսկերպ փորձում են սյունեցիների ոգին կոտրել, Մանվել Փարամազյանն ընդգծեց՝ Սյունիքը չեն կարող կոտրել. «Ո՞նց կարող են կոտրել, սա գենետիկորեն է եկել, մեր երակներով դավաճանի արյուն չի հոսում։ Սա մեր գեներից եկած մաքուր արյուն է։ Սյունեցիները դարեր շարունակ պայքարել են թշնամու դեմ, մեր կռիվն արդար է եղել։ Ու՞մ է դուր գալիս այս իրավիճակը։ Մենք էլ ենք հոգնել, մինչև ե՞րբ կարելի է այսպես լռել»,-ասաց համայնքապետը։

Աղբյուր` Փաստինֆո