Փաստ ինֆո

 «Ես չեմ ասոցացվում անկախ պատգամավորների խմբի հետ։ Գործունեությունս պետք է շարունակեմ գործադիրում, իսկ թե ո՞ր ոլորտում, որոշումը կլինի, այդ ժամանակ կհանրայնացվի, չեմ ուզում շտապել հայտարարություն անել, դեռ վերջնական որոշում չկա»,- այս մասին լրագրողների հետ զրույցում ասել է «Իմ քայլը» խմբակցության անդամ Նարեկ Մկրտչյանը, ով օրեր առաջ պատգամավորական մանդատից հրաժարականի դիմում էր ներկայացրել։

Հարցին՝ արդյոք իշխանությունը պետք է շարունակի աշխատել և արդյոք նախկին պատգամավորը գործադիրում աշխատելով կատարվածի համար պատասխանատվությունը չի կիսելու, Մկրտչյանը նշեց՝ եթե լինի հանրային պահանջ, կհեռանան։

«Այս, նախկին, ապագա՝ որևէ իշխանության շարունակականությունը կախված է ժողովրդից։ Եթե ժողովուրդը ցանկանում է որևէ իշխանության տեսնել որպես իր իշխանություն, ապա այդ իշխանությունը այդ ժամանակ պետք է շարունակի։ Եթե կլինի հանրային պահանջ, դժգոհություն որևէ իշխանության նկատմամբ, ապա այդ իշխանությունը պետք է հեռանա»։

Սյունիքում վարչապետ Նիկոլ Փաշինյանի դեմ ակցիան Մկրտչյանը հանրային պահանջ չի համարում։

«Դա հանրային պահանջ չի կարելի ձևակերպել։ Այդ խմբակը, որ շատ պարզ է, թե որ շրջանակի կողմից էր ուղղորդվում, թե նախկինում ինչ գործընթացների մեջ են ներգրավված եղել։ Երբ այդ սադրիչները չկային, ժողովուրդը հանգիստ շփվում էր։ Եթե մարդը ունենար բողոքի ձայն ասելու, կարող էր շատ քաղաքակիրթ ճանապարհով մոտենալ»։

Մկրտչյանը սադրիչ է համարում նաև այն մարդկանց, ովքեր Սյունիքում ճանապարհ էին փակել, բայց պատերազմի մասնակից են, տունն են կորցրել։

«Ես այնտեղ կոնկրետ մարդիկ գիտեմ, որ ներկայացնում են կոնկրետ քաղաքական ուժի, կոնկրետ շրջանակների։

Բանական մարդը շատ կոնստրուկտիվ շրջանակներում կարողանում է քննադատել, իշխանությունը միշտ էլ պատրաստ է լսել քննադատություն։ Ով ասաց, որ իշխանությունը իր սխալները չի ընդունում, ներողություն չի խնդրում»։

Պատգամավորը եզրափակեց՝ իշխանությունը ընդունում է սխալները, ներողություն խնդրում և շարունակելու է աշխատել՝ առաջիկա ընտրություններին ժողովուրդը որոշելու իրավունք ունի։

Աղբյուր` Փաստինֆո