Փաստ ինֆո

Սյունիքի մարզի Շուռնուխ համայնքի ղեկավար Հակոբ Արշակյանի եղբայրը՝ Աշխարհապետ անունով հայտնի Արարատ Աղաբեկյանը, քիչ առաջ ազատ է արձակվել։ ՔԿ-ն նրան մեղադրանք է առաջադրել ՀՀ ՔՕ 258-րդ հոդվածի 1-ին մասի (խուլիգանություն) հատկանիշներով ու որպես խափանման միջոց ընտրել ստորագրություն չհեռանալու մասին։

ՔԿ շենքի մոտ լրագրողների հետ զրույցում Արարատ Աղաբեկյանը պատմել է, թե ինչ անմարդկային վերաբերմունքի է արժանացել իրավապահպների կողմից՝ պնդելով, որ իրեն ապօրինի են բերման ենթարկել, քանի որ ինքը ոչ մի բանի հետ կապ չի ունեցել։

«Այսքան ճանապարհ եմ անցել, այսքան մարտական ուղիս, ստորացնելով ինձ բերել ու հասցրել են այստեղ։ Ոմն մի դեպուտատ ասել է, որ ստորացնելով, չոքեցնելով պիտի բերեն այստեղ, դրա համար ինքը պատասխան կտա այդ «պ…կը»։ Նա ի՞նչ իրավունքով է ասել, որ ինձ ու մնացած տղաներին պատվից ցածր համարելով, զրկանքներով բերեն։ Ես դեռ կբարձրաձայնեմ համապատասխան մարմիններին»,- նշել է Աշխարհապետը ու «3 պատերազմ անցած տղա եմ, էստեղ դիվերսանտի նման մեջքը կռացրած են բերում, պատասխան են տալու»

Դառնալով խուլիգանության մեղադրանքին՝ նա նշել է, որ իրեն չեն կարող որեւէ մեղադրանք առաջադրել, քանի որ ինքը ոչ մի մեղք չի գործել։

«Ես մեղք գործող տղա չեմ։ Ինչ-որ կապում են վրչոյի ավտոշարասյան հետ, որ ձու եմ նետել, ես ձու նետող տղա չեմ, ես գրանատ նետող տղա եմ, իմ մարտավարությունը դա է։ Ես կատու չեմ իրենց նման, որ գիշերվա կես գամ, մտնեմ գյուղացու տունը, խաչագողի նման։ Գիշերով գյուղ չեն գնում, մարդու տուն չեն գնում։ Մտել է գյուղացու տունը, գյուղացին ասում է՝ հարգալիր հյուր չես, վռնդում է տնից, նորից են մտնում։ երեխեքն էլ վախենում են, թե թուրքերն են շրջապատել»։

Նա վերահաստատել է, որ օրեր շարունակ տանը բուժում է ստացել։ «Ես 6 օր շարունակ իմ տանը բուժվել եմ, անգամ տնից դուրս չեմ եկել։ Առավոտ շուտ եկել ու ինձ տնից հանել են։ Դրա համար բոլորն էլ պատասխան կտան։ Թքած ունեմ այս կառավարման վրա։ Չգիտեմ՝ այս ապօրինությունները մինչեւ երբ են շարունակվելու։ Այս խայտառակության պատասխանն ո՞վ է տալու, ո՞վ է մեզ պատասխանելու այսքան քաշքշելու համար»։

Ա.Աղաբեկյանը հայտարարել է, որ անկոտրուն է ու թույլ չեն տա, որ Սյունիքը հանձնեն։

«Սյունիքը ուզում են տալ, մենք էլ չենք թողում ու չենք էլ թողելու։ Ես այսօր այստեղ եմ, բայց կինս, երեխաներս, եղբայրներս այնտեղ են ու չեն տալու»,- ընդգծել է նա։

Աղբյուր` Փաստինֆո