Փաստ ինֆո

Նոյեմբերի 9-ի լույս 10-ի գիշերը կապիտուլյացիոն ակտի ստորագրմանը հաջորդած բողոքի ակցիայի ընթացքում ԱԺ նախագահ Արարատ Միրզոյանի նկատմամբ բռնություն գործադրելու մեջ մեղադրվող Ժիրիկ Սիրեկանյանը կշարունակի մնալ կալանավորված։ Երևանի ընդհանուր իրավասության դատարանը՝ դատավոր Տաթևիկ Գրիգորյանի նախագահությամբ, բավարարել է Սիրեկանյանի նկատմամբ ընտրված խափանման միջոց կալանավորումը ևս երկու ամսով երկարացնելու նախաքննական մարմնի միջնորդությունը։ Սիրեկանյանի պաշտպան Լուսինե Մարտիրոսյանը «Փաստինֆո»-ի հետ զրույցում նշեց, որ դատարանը ևս երկու ամսով երկարացրել է կալանավորման ժամկետն՝ ակնհայտ ապացույցների առկայության պայմաններում, որ անձը Արարատ Միրզոյանին ծեծի ենթարկելու ժամանակ չի եղել դեպքի վայրում։ Փաստաբանը նշեց, որ դատարանի որոշումը դեռևս չի ստացել, իսկ ստանալուց հետո կբողոքարկի այն։ 

Ինչպես արդեն տեղեկացրել ենք՝ 2020թ նոյեմբերի 9-ի լույս 10-ի գիշերը Նիկոլ Փաշինյանի կողմից կապիտուլյացիոն ակտի ստորագրումից հետո Երևանում լայնածավալ բողոքի ակցիաներ են իրականացվել, ինչի ընթացքում մի խումբ քաղաքացիներ մուտք են գործել կառավարության և ԱԺ շենքեր և կառավարական ամառանոց։ Բացի դա՝ նույն օրը Դեմիրճյան փողոցում բռնություն է գործադրվել ՀՀ ԱԺ նախագահ Արարատ Միրզոյանի նկատմամբ, վերջինս ստացել էր մարմնական վնասվածքներ։ Քաղաքացիների ՀՀ կառավարության շենք, կառավարական առանձնատուն մուտք գործելուց հետո՝ Ն. Փաշինյանը հայտարարել է, թե հափշտակվել է օծանելիք, համակարգիչ, ժամացույց եւ այլ իրեր։ Դեպքերի առթիվ ՀՀ ԱԱԾ-ում հարուցվել է քրեական գործ, որից առանձնացված մասով նախաքննությունն ավարտվել է և գործն ուղարկվել է դատարան, իսկ մյուս դրվագներով, այդ թվում՝ Արարատ Միրզոյանի նկատմամբ բռնություն գործադրելու դրվագով նախաքննությունը շարունակվում է։

Սիրեկանյանին նոյեմբերի 12-ին մեղադրանք է առաջադրվել ՀՀ քրեական օրենսգրքի 225-րդ հոդվածի 2-րդ մասով և 301.1 հոդվածի 1-ին մասով, իսկ նոյեմբերի 13-ին դատարանը բավարարել է նրա նկատմամբ կալանավորումը որպես խափանման միջոց ընտրելու մասին ԱԱԾ քննիչի միջնորդությունը։ Պաշտպանը վերաքննիչ բողոք է ներկայացրել Սիրեկանյանին կալանավորելու մասին որոշման դեմ, ինչը դեկտեմբերի 17-ին բավարարվել է և վերջինս ազատ է արձակվել։ Վերաքննիչ դատարանի նշված որոշման դեմ ՀՀ գլխավոր դատախազի կողմից բերվել է վճռաբեկ բողոք, որը բավարարվել է և Սիրեկանյանը կալանավորվել է։

Փաստաբան Լուսինե Մարտիրոսյանը «Փաստինֆո»-ի հետ զրույցում մանրամասներ հայտնեց՝ նշելով, որ դեռևս նոյեմբեր ամսին առաջնային միջնորդության քննության ժամանակ դատարանը գտել է, որ բացակայում է հիմնավոր կասկածը, որ անձն առնչություն ունի զանգվածային անկարգությունների հետ,եւ հիմնավոր կասկածը հաստատված է համարել միայն Արարատ Միրզոյանի ծեծի առնչությանը։ Փաստաբանը վերաքննիչ բողոք է ներկայացրել՝ կալանավորման որոշման դեմ, որի քննության շրջանակներում դատարան են ներկայացվում լրացուցիչ նյութեր, ընդ որում՝ դատարանի պահանջով քննիչը ևս ներկայացնում է լրացուցիչ նյութ, որով հիմնավորվում է, որ անձի հեռախոսի ալեհավաքները նշված ժամանակահատվածում չի գտնվել դեպքի վայրում։

«Վերաքննիչ դատարանը նոր ներկայացրած ապացույցների հիման վրա արձանագրում է, որ բացակայում է հիմնավոր կասկածի առկայությունը, անձը ենթադրյալ դեպքի ժամանակահատվածում չի գտնվել դրա կատարման վայրում՝ Պռոշյան-Դեմիրճյան փողոցի հատվածում, այսինքն՝ անձը ֆիզիկապես, տեխնիկապես չէր կարող կատարել իրեն վերագրվող գործողությունները»,- նշեց Մարտիրոսյանը՝ հավելելով, որ դատախազությունը բերել է վճռաբեկ բողոք, իսկ Վճռաբեկ դատարանը շատ արագ բեկանում է Վերաքննիչ դատարանի որոշումը՝ օրինական ուժի մեջ թողնելով առաջին ատյանի դատարանի որոշումը և, քանի որ իր պաշտպանյալն արդեն մեկ ամիս յոթ օր արդեն անազատության մեջ է եղել, մի քանի օր ՔԿՀ-ում գտնվելուց հետո նախաքննական մարմինը նոր միջնորդություն է ներկայացրել՝ կալանավորման ժամկետը ևս երկու ամսով երկարացնելու համար։

Մարտիրոսյանի խոսքով՝ անտեսվել է, որ դատարանն առաջին միջնորդության քննության ժամանակ գտել է, որ զանգվածային անկարգությունների մեղադրանքով հիմնավոր կասկածը բացակայում է, որևէ նոր տվյալ ձեռք չի բերվել, որ անձը դրանց մասնակից է, բայց մեղադրանքը շարունակում է մնալ և շարունակում են նաև այդ հոդվածով միջնորդություններ ներկայացնել դատարան՝ կալանավորման ժամկետը երկարացնելու մասին, անտեսվել է, որ գործում արդեն առկա է հեռախոսի վերծանումները, որոնցով արդեն հաստատվել է, որ իր պաշտպանյալը դեպքի վայրում չի եղել։ Փաստաբանի դիտարկմամբ՝ դատարանն անտեսելով վերոգրյալը բավարարել է քննիչի միջնորդությունը, ինչը զարմանալի էր, քանի որ դատավորի վերաբերյալ կարծիքը միանգամայն այլ էր։ Մարտիրոսյանը նշեց, որ միտում է տեսնում, գտնում է, որ դա վարչապետի լայվերի, հայտարարությունների արդյունքն է։

Հեղինակ՝ Իզաբել Սահակյան

Աղբյուր` Փաստինֆո