Փաստ ինֆո

Շուռնուխի գյուղապետ Հակոբ Արշակյանի եղբորը՝ Աշխարհապետ անունով հայտնի Արարատ Աղաբեկյանը դեռևս ձերբակալված է։ Նրան մեղսագրվում է ՀՀ քրեական օրենսգրքի 258-րդ հոդվածի 1-ին մասով նախատեսված արարք՝ խուլիգանություն կատարելու կասկածանք։

Այս պահին նրան ՁՊՎ-ից տեղափոխում են ՀՀ քննչական կոմիտե, ամենայն հավանականությամբ՝ ազատ կարձակվի։ Այս մասին «Փաստինֆո»-ի հետ զրույցում ասաց Արարատ Աղաբեկյանի պաշտպան Արմեն Մելքոնյանը։

Փաստաբանը հայտնեց, որ Աղաբեկյանին ձերբակալելու որոշման դեմ բողոք է ներկայացվել, պետք է դատական նիստ տեղի ունենա։

«Կարծում եմ՝ քննչականը հիմա առաջ է ընկնում՝ հասկանալով, որ մարդիկ ապօրինի են ձերբակալված, հիմա ինքը փոխում է խափանման միջոցները, կարծում եմ՝ անազատության հետ կապ չունեցող խափանման միջոց կընտրի, որովհետև ամոթ է սա»,- նշեց Մելքոնյանը։

Ինչպես արդեն տեղեկացրել ենք՝ Սյունիքում Նիկոլ Փաշինյանի դեմ իրականացվող ակցիաների առթիվ հարուցված քրեական գործով ձերբակալվել է Շուռնուխի գյուղապետ Հակոբ Արշակյանի եղբայրը՝ Աշխարհապետ անունով հայտնի Արարատ Աղաբեկյանը, որն, ի դեպ, քանի օր էր առողջական խնդիրներ ուներ, ավելին՝ նրա ինքնազգացողությունը վատացել է նաև ՔԿ-ում, ինչից հետո շտապօգնության մեքենա է ժամանել ՔԿ։

Մելքոնյանը մեզ հետ զրույցում նշեց, որ Աղաբեկյանն ընդհանրապես որևէ գործողության չի մասնակցել, վեց օր ինքնամեկուսացված է եղել՝ վատառողջ լինելու պատճառով։ Փաստաբանն ընդգծեց, որ իր պաշտպանյալի ազատության հարցը լուծելուց հետո հետամուտ են լինելու, որ բոլոր այն անձինք, որոնք Արարատի նման մարդուն, որ երեք պատերազմ է անցել, ապօրինի ձերբակալել են, բերման ենթարկել, ապօրինի անազատության մեջ պահել, նման նվաստացուցիչ վերաբերմունք են ցուցաբերել՝ պատասխան տան։ Փաստաբանը նշեց, որ առաջիկայում պատրաստվում են հանցագործության մասին հաղորդում ներկայացնել, քանի որ այս ամենն անպատիժ մնալ չի կարող։

Փաստաբանը նշեց, որ անձին ձերբակալելու համար հիմքեր են պետք, առնվազն պետք է ոստիկանության կամ ԱԱԾ որևէ աշխատակից պետք է զեկուցագիր գրած լինի, որ օպերատիվ տվյալներով հիմնավորվել է, որ անձը մասնակից է եղել և կատարել է այս կամ այն գործողությունները, բայց մարդը վեց օր իր հայրական տանից դուրս չի եկել, հետևաբար՝ որևէ գործողություն չի արել։ Նրա խոսքով՝ իրավապահ մարմնի այն աշխատակիցը, որը կեղծ զեկուցագրեր է գրել և հիմքեր է ստեղծել, որ մարդուն բերման ենթարկեն, արդյո՞ք պետք է անպատիժ մնա, որ վաղը մյուսների վերաբերյալ նման զեկուցագիր գրի։

«Մարդը վեց օր իր տանից ընդհանրապես դուրս չի եկել, որևէ բանի մասնակից չէ, ընդ որում՝ նման ճանապարհ է անցել... ուղղակի ամաչում եմ այն մարդկանց համար, որոնք այդ քայլն արեցին։ Իհարկե, բոլորին չի վերաբերում, ՔԿ-ում, համենայն դեպս, իմ ներկայությամբ մարդիկ իրենց պահել են պարկեշտ, բարձր, որևէ բան չունեմ ասելու, իսկ այն, ինչ ինքս տեսա մինչ այդ, ուղղակի տեղս չեմ գտնում »,- նշեց պաշտպանը։

Հետաքրքրվեցինք՝ արդյոք դիմել են ՄԻՊ-ին, ինչին ի պատասխան պաշտպանը նշեց, որ ՄԻՊ-ին էր դիմել իր գործընկերը՝ Մենուա Հովսեփյանի պաշտպանը, ՔԿ-ում ինքն արդեն տեսել է ՄԻՊ-ի ներկայացուցչին, որն ակտիվորեն աշխատում էր։

«Ես Աղաբեկյանին տեսել եմ ժամը 19։30-ի սահմաններում, դրանից հետո նրա նկատմամբ որևէ ոչ մարդկային վերաբերմունք չի դրսևորվել, ուղղակի ապօրինի ձերբակալվել և տեղափոխվել է ՁՊՎ։ Մնացած վերաբերմունքը եղել է նորմալ, իսկ մինչ այդ կատարվածը տեսել եք, շատ ազդված էի դրանից։ Տարիներ առաջ, որ կարդում էի, որ Սարդարապատի հերոսներին բոլշևիկները 21թ Երևանում կացնահարեցին, այդ տպավորությունն էր ինձ մոտ, երբ տեսնում էի, թե ինչպես են Արարատի նման մարդուն այդ վիճակում քարշ տալով բերում, ուղղակի մտածում էի՝ այդ մարդիկ իրենց ծնողների աչքերին ոնց են նայելու»,- ասաց փաստաբանը։

Հիշեցնենք, որ Սյունիքում Նիկոլ Փաշինյանի դեմ Սյունիքում իրականացված բողոքի ակցիաների առթիվ հարուցված քրեական գործի շրջանակներում երեկ ձերբակալվել է 16 անձ, այդ թվում՝ Մեղրիի քաղաքապետ Մխիթար Զաքարյանը, փոխքաղաքապետ Արմեն Սամվելյանը, Գորիսի փոխքաղաքապետ Մենուա Հովսեփյանը, Շուռնուխի գյուղապետ Հակոբ Արշակյանի եղբայրը՝ Աշխարհապետ անունով հայտնի Արարատ Աղաբեկյանը։ Նշենք, որ սյունեցիները գաղտնի ժամանած Փաշինյանին դիմավորել են՝ «Նիկոլ, դավաճան», «կապիտուլյանտ» և այլ վանկարկումներով։ Վերջինս անգամ չի կարողացել մուտք գործել Քաջարան և վերադարձել է Կապան՝ Սյունիքի մարզպետարան, որտեղ կայացած խորհրդակցության ժամանակ հրահանգներ է տվել իրավապահ մարմինների ներկայացուցիչներին՝ կտրուկ քայլեր իրականացնել եւ հրապարակավ պատժել։

Հեղինակ՝ Իզաբել Սահակյան

Աղբյուր` Փաստինֆո