Փաստ ինֆո

Դրանք անիմաստ ու անտեղի շահարկումներ են։ ԱԺ-ում լրագրողների հետ զրույցի ժամանակ այս մասին ասաց Անվտանգության խորհրդի քարտուղար Արմեն Գրիգորյանը՝ անդրադառնալով այն կարծիքներին, որ իշխանություններին համարում են Թուրքիայի շահերը սպասարկող։

Հարցին՝ ճանապարհների ապաշրջափակման դեպքում անվտանգության առումով Հայաստանը խնդիրներ չի՞ ունենալու, Արմեն Գրիգորյանն ասաց, որ ապաշրջափակման հարցերը դեռ քննարկման փուլում են. «Առարկայական որևիցե բան այս պահին դեռ չկա։ Երբ առարկայական լինի, բնականաբար քննարկումների ընթացքում անվտանգության հարցերն առաջնային են լինելու։ Մեզ համար ամենաառաջնային խնդիրն անվտանգությունն է»,-ասաց ԱԽ քարտուղարը։

Դիտարկմանը, որ ԱԽ-ի կողմից գաղտնազերծված փաստաթուղթն ավելի շատ հարցեր առաջացրեց հանրության մոտ, քան պատասխանեց եղած հարցերին, Արմեն Գրիգորյանն ասաց.

«Համոզված եմ, որ հանրությունն ամբողջովին իր հարցերի պատասխանները ստացել է։ Մի որոշ խմբակ կարող է ասել, որ դա հարցերի պատասխանը չի տվել, և ես խորհուրդ եմ տալիս, որ մեր հրապարակումներն առանձին երբեք չկարդան։

Մեր հրապարակումները կարդալու համար պետք է բացել Օնիկ Գասպարյանի նոյեմբերի 17-ի հայտարարությունը, դրանց բոլոր տողերը կարդալուց հետո բացել մեր գաղտնազերծած հատվածները։ Երբ ասում է, որ հունիսի 8-ին նշանակվելուց հետո ԱԽ-ին է ներկայացրել ռազմաքաղաքական տարածաշրջանային իրավիճակը, բայց ԱԽ օրակարգում տեսնում ենք, որ նա զեկույց չունի։ Հասկանում ենք, որ սուտ է ասում։ Երբ ասում է, որ ինքը զգուշացրել է պատերազմը 2-3 օրում պետք է կանգնեցնել, հասկանու՞մ եք, որ պատերազմը կանգնեցնել առաջարկող գեներալ-լեյտենանտը չի կարող ասել, որ Ջաբրայիլում հաջողություններ ունենք, որ թշնամին որևէ առաջընթաց չունի։ Ո՞նց կարող է Օնիկ Գասպարյանն իր տեքստում ասի 2-3 օրում կանգնեցրեք և իր զեկույցում ասի, որ թշնամին առաջընթաց չի ունեցել»,-նշեց ԱԽ քարտուղարը՝ ընդգծելով, որ իրենց հրապարակած տեքստը բավարար է, որ հանրությունը համապարփակ հասկանա, թե ինչ է տեղի ունեցել։

Աղբյուր` Փաստինֆո