Փաստ ինֆո

Ձերբակալությունները մեծ հաշվով անակնկալ չէին, որովհետև մարզպետարանում նստած Նիկոլ Փաշինյանն ուղիղ ցուցում էր տալիս, որ հրապարակայնորեն պատժվեն այն մարդիկ, ովքեր այդ ակցիաներին մասնակցել են։ Այս մասին ՀՀ քննչական կոմիտեի դիմաց՝ ի պաշտպանություն սյունեցիների ակցիայի ժամանակ ասաց սյունեցի պատգամավոր Աննա Գրիգորյանը։ 

«Անկեղծ ասած ինձ համար հասկանալի չէ, թե այդ գործընթացով ինչու է հատկապես Մեղրու համայնքապետն անցնում, սակայն ես կարծում եմ, որ սա քաղաքական հաշվեհարդար է, ես սրան այլ որակում չեմ կարող տալ, որովհետև իրավական մասով սա ուղղակի փուչիկ է»,-ասաց ԱԺ անկախ պատգամավոր Աննա Գրիգորյանը, հավելելով, որ  խուլիգանության հոդվածով Մեղու համայնքապետին բերման ենթարկել միայն այն արարքի համար, որ նա փորձել է  համաքաղաքացիներին հանդարտեցնել, պարզապես  անթույլատրելի է։ 

«Սա ուղղակի աբսուրդ է, և ես կարծում եմ, որ  քաղաքական նկատառումներից են նրան բերման ենթարկել»,-համոզված է պատգամավորը։ 

Պատգամավորի կարծիքով, ոչ ոք՝ այդ թվում նաև սեփական թիմի պատգամավորները տեղյակ չեն եղել ՀՀ վարչապետի՝ Սյունիքի մարզ այցի մասին։

«Եթե որևէ մեկը տեղյակ չէր, որ նա պետք է այցելի Սյունիք, ապա ինչպես պետք է ուղղորդված լինեին այդ ակցիաները։ Սյունեցին տեսնում է, որ ադրբեջանցի կանգանծ է իր դռան առջև, դրանից հետո էլ պետք է ուղղորդե՞ն։ Մարդիկ իրենց խնդիրների մասին ուղղակի ցանկանում են բարձրաձայնել»,-եզրափակեց  սյունեցի պատգամավորը։

 Մանրամասները՝ տեսանյութում

Աղբյուր` Փաստինֆո