Փաստ ինֆո

Մեղրիի համայնքապետի փաստաբան Գայանե Պապոյանը տեսանյութ է տարածել, թե ինչպես են Քննչական կոմիտեում բռնի ուժով, քարշ տալով բերման ենթարկում Գորիս համայնքի ավագանու անդամ, շուռնուխի բնակիչ Արարատ Աղաբեկյանին։ Ընդ որում՝ պատերազմի մասնակցի ձեռքերին ձեռնաշղթա են հագցրել հենց ՔԿ շենքում, որտեղից նա փախուստի դիմել պարզապես չէր կարող։

Վերջինս պնդում է, որ ինքը վատառողջ է, բայց նրան քարշ տալով տանում են քննիչի սենյակ։

«Մի շաբաթա թոքաբորբ եմ, ինչ կապ ունեմ ես, տաքությունս բարձր է։ Մեռնում եմ, շտապօգնություն եմ ուզում, դեղերս բերեք»,- քննիչներիին ասում է Աղաբեկյանը։

Փաստաբանը քննիչներին զգուշացնում է, որ իրավունք ունի տարածքում գտնվելու, իսկ քաղաքացին վատառողջ է, քննիչներն էլ նրան խոշտանգում են։

Նշենք, որ բերման ենթարկվածը Շուռնուխի գյուղապետ Հակոբ Արշակյանի կրտսեր եղբայրն է։ Աղաբեկյանի տունը նոյեմբերի 9-ից հետո մնացել է ադրբեջանական կողմին, վերջինս էլ տունը հանձնելուց առաջ այրել է։

Աղաբեկյանը մասնակցել է արցախյան երեք պատերազմներին ու ինչպես Հակոբ Արշակյանը ավելի վաղ հայտնել էր «Փաստինֆո»-ին՝ միշտ էլ կոշտ է արտահայտվել վարչապետի հասցեին, խոչընդոտել է նրա նախորդ այցը Սյունիք։

Հակոբ Արշականը հայտնել էր նաև, որ երեկ վարչապետի այցը Աղաբեկյանը չի խոչընդոտել, քանի որ տասը օր է հիվանդ, անկողնային վիճակում է եղել, ջերմել է։ Կարմիր բերետավորները բերման են ենթարկել, տարել են պառկած տեղից և ոչ մի բան չեն ներկայացրել։

ՔԿ շենքում խոշտանգված շուռնուխցուն օգնություն ցուցաբերելու համար շտապօգնություն է կանչվել։

Աղբյուր` Փաստինֆո