Փաստ ինֆո

Ալիևի ագրեսիվ հայտարարությունները նորություն չեն։ Նա խոսել է «Էրիվանի» նահանգի ադրբեջանական լինելու մասին, նա չի թաքցրել Սևանի նկատմամբ իր նկրտումները։ Եվ, երբ Հայաստանի իշխանություններից որևէ արձագանք չի ստանում, բնական է, որ լկտիանում է և իր ներքին լսարանում հերթական միավորները հավաքում։ Շաբաթներ առաջ էլ թուրքալեզու երկրների համաժողովին իր գործընկերներին էր հրավիրում Զանգեզուր։ Այս մասին «Փաստինֆո»-ի հետ զրույցում ասաց ՀՅԴ ԳՄ անդամ Լիլիթ Գալստյանը՝ անդրադառնալով Ալիևի՝ Զանգեզուրի վերաբերյալ հայտարարություններին.

«Զանգեզուրի միջանցքի ստեղծումը լիովին համապատասխանում է մեր ազգային, պատմական և ապագայի շահերին։ Մենք կատարելու ենք Զանգեզուրի միջանցքի իրականացման խնդիրը, ուզում է Հայաստանը, թե ոչ», - հայտարարել Էր Ալիևը:

Լիլիթ Գալստյանի արձանագրմամբ՝ սա գործող իշխանության վարած ազգադավ քաղաքականության արդյունքն է.

«Հայոց պետականությունը անտերության է մատնվել՝ թուրքի և ադրբեջանցու շահ սպասարկող անղեկ ու անատամ գոյության։ Այսպես՝ խոսում են պարտվածի հետ, այսպես արհամարհում են կապիտուլյանտին։ Եվ երբ պնդում էինք, որ իշխանափոխությունն անխուսափելի է, նկատի ունեինք այնպիսի քաղաքական առաջնորդի և թիմի, որը բանակցելու կարողություն կունենա, որի հետ այդպես նվաստացնելով չեն խոսի, որը կկարողանա վերանորոգել Հայաստանի վիրավոր արժանապատվությունը, սուվերենությունն ու անվտանգությունը»,-ասաց Լիլիթ Գալստյանը։

Անդրադառնալով Նիկոլ Փաշինյանի Սյունիք կատարած այցին և սյունեցիների ընդվզումներին, ՀՅԴ ԳՄ անդամը նշեց, որ Նիկոլ Փաշինյանը վաղուց Հայաստանում ազատ շրջելու ոչ համարձակություն ունի, ոչ կարողություն.

«Ինչ եք կարծում՝ կապիտուլյանտի առջև գորգ պիտի փռեի՞ն թուրքի ոտքը Սյունիքում բացող կապիտուլյանտի առջև։ Փաշինյանի հենարանը ուժայիններն են, դա նորություն չէ։ Ոստիկանության որոշ ծառայությունների աշխատավարձի բարձրացմամբ, ռեպրեսիվ գործիքակազմով, նա փորձում է պահել իշխանությունը, ավելի շուտ ավարտին հասցնել իր հանձնառությունները։ Դիմելու է ռեպրեսիաների, հստակ է՝ այլ ռեսուրս չունի ազգակործանը։

Ի դեպ, մեկնելուց առաջ փոխել էր ուժայիններին, բայց հո չէ՞ր կարող ժողովրդի վերաբերմունքը փոխել։Դեռ պիտի հասկանալ՝ թե ինչու էր կապիտուլյանտ որոշել մեկնել Սյունիք, երբ հստակ էր, թե ինչ վերաբերմունքի է արժանանալու դավաճանը»,-ասաց Գալստյանը :

Հարցին՝ ինչպե՞ս է վերաբերվում փաստին, որ սյունեցիների անվտանգային խնդիրները լուծելու, նրանց աջակցելու փոխարեն, նրանց դեմ ռեպրեսիվ միջոցներ են կիրառվում, Լիլիթ Գալստյանն ասաց.

«Փաշինյանն առհասարակ հայ ժողովրդի կողքին չէ։ Ինչպես կարող է Սյունեցու կողքին լինել մեր շահերը դավաճանած անձը, Ալիևի՝ մեր տարածքային ամբողջությանն ուղղված հոխորտանքներին ծպտուն չհանող վարչապետ կոչեցյալը, խրոնիկական ստախոսը։ Փոխարենը Սյունիքը լցրել է ոստիկաններով և այլ ուժայիններով՝ ստիպելով իրականացնել իր անօրինական պահանջները։ Սրանք անճարակ մտասևեռվածի ժամանակավոր քայլեր են։

Նա չի կարողանում կառավարել երկիրը, նա ունակ չէ իրավիճակից դուրս գալու լուծումներ գտնել։Սա ազգային խայտառակություն է, որից օր առաջ պիտի ազատվել»։

Աղբյուր` Փաստինֆո