Փաստ ինֆո

Ապրիլին 2019-ի համեմատ ապրանքաշրջանառության և գործարքների քանակով 20-22 տոկոսի աճ է գրանցվել։ Այս մասին կառավարության նիստի ժամանակ ասաց ՊԵԿ նախագահ Էդվարդ Հովհաննիսյանը։

ՀՀ վարչապետ Նիկոլ Փաշինյանը նկատեց, որ առևտրաշրջանառության մասով պետք է հաշվի առնեն, որ գնաճ էլ կա. «Եթե 20 տոկոս աճ ունենք և ենթադրենք 6 տոկոս գնաճ, մեթոդաբանությունը ո՞րն է։ Դա էլ է վերլուծության նյութ, թե ինչքանով է գնաճը նպաստել շրջանառության աճին և որքանով է բնական կամ բովանդակային։ Այս պահին նման վերլուծություն ունե՞նք»,-հարցրեց Նիկոլ Փաշինյանը։

ՊԵԿ նախագահը նշեց, որ գնաճի գործոնն առկա է, բայց ապրիլի ցուցանիշները դեռևս հրապարակված չեն և նման վերլուծություն չեն կարող անել։

Վարչապետը, կրկին անդրադառնալով աշխատատեղերի ավելացման թեմային, նշեց, որ աշխատատեղերի բացարձակ թիվը 622 հազար է. «Առաջին անգամ գրանցված աշխատատեղերի 600 հազարի շեմը հաղթահարել ենք 2019թ.-ի մայիսին և դրանից առաջ Հայաստանում երբեք գրանցված 600 հազար աշխատատեղ չի եղել։ 2021-ի մարտին 2018-ի նկատմամբ ունենք 85038 աշխատատեղի տարբերություն»։

ՀՀ էկոնոմիկայի նախարար Վահան Քերոբյանն էլ հավելեց՝ իրենց վերլուծությունները ցույց են տալիս, որ սա տնտեսական աճի հետևանք է. «Անցած տարվա մարտին կորոնավիրուսի հետևանքով դեռ աշխատատեղեր չէին կրճատվել, բայց աճի տեմպը մի փոքր կոտրվել էր։ Եթե համեմատենք, ստացվում է՝ այս տեմպերով եթե գնանք, մայիսին ապրիլի համեմատ կունենանք գրանցված աշխատատեղերի ռեկորդ Հայաստանի պատմության մեջ։ Կարծում եմ՝ այս ցուցանիշները խոսում են այն մասին, որ աշխատատեղերի շուկան վերականգնվել է»,-ասաց նախարարը։

Աղբյուր` Փաստինֆո