Փաստ ինֆո

Սյունիքում կազմակերպված ակցիան Նիկոլ Փաշինյանի մեկ ժամ տևած ելույթի պատասխանն էր: Այն շրջանակները, որոնց ուղղված էին որոշ հարցեր այդ մեկ ժամանոց ելույթում, չկարողանալով որևէ կերպ հակադարձել, գնացին այս քայլին և մի 30-40 խուժանի հավաքելով մի տեղ, կազմակերպեցին այսպես կորված, անհնազանդությունների ակցիաները: Այս մասին ԱԺ-ում լրագրողների հետ զրույցում հայտարարել է իմքայլական պատգամավոր Հրաչյա Հակոբյանը:

«Ես, որպես քաղաքական թիմի անդամ, որպես նաև Նիկոլ Փաշինյանի ընտանիքի անդամ ասում եմ՝ դավաճանն էլ են իրենք, կապիտուլյանտն էլ են իրենք, մնացած բոլոր հայհոյանքները, որ նրանք ուղղում էին: Ես բառ առ բառ, տառ առ տառ ուղղում եմ իրենց: Ես այդ բոլորն ուղղում եմ այդ մարդկանց, այդ մարդկանց քաղաքական հայրերին, հրահանգ տվողներին»,-ասաց նա:
Դիտարկմանը, որ սյունեցիների բնակավայրի մի մասն անցել է հակառակորդին, և նրանք իրավունք ունեին բողոքի ձայն բարձրացնել, պատգամավորը պնդեց, որ իրենց բնակավայրերի մի մասը դեռևս 2010թ-ին թղթով են հանձնել:

Անդրադառնալով ակցիայից հետո սյունեցիների բերման ենթարկվելուն պատգամավորն ասաց.
«Այո, նրանք պետք է բերման ենթարկվեն և ստորանալով բերման ենթարկվեն, որովհետեւ նրանք հայհոյում են ՀՀ քաղաքացիներին»:
Դիտարկմանը, որ 2018թ-ին նախկին իշխանություններին ևս քննադատում էին, Հրաչյա Հակոբյանն արձագանքեց.
«2018-ին որևէ հայհոյանք հնչե՞լ է իշխանության հասցեին: Եթե 2016-ին Աշոտյանին հայտնի վիրավորական բառն ասելու համար պետք է պատժվեին, թող պատժվեր: Եթե «պրիվետ Ռոբ» ասելու համար մարդուն պետ էր պատժել, թող պատժեին, ոչ թե սամասուդ անեին»,-ասաց Հակոբյանը:
Իմքայլական պատգամավորը, անդրադառնալով ընդդիմության գործունեությանը, նշեց, որ նրանք 4 ամիս ժամանակ ունեին իշխանությանը հեռացնելու, սակայն չստացվեց.

«Խոսքս ուղղում եմ Վազգեն Մանուկյանին, Գեղամ Մանուկյանին, Իշխանիկ Սաղաթելյանին: Իրենք ժամանակ ունեին ժողովրդին մոբիլիզացնել, չկարողացան ու հիմա Մաուգլիի շակալների նման հարմար առիթ են ման գալիս, որ մի տեղ մի բան լինի, իրենք հայտնվեն: Ասում են՝ մենք սյունեցու կողքին ենք: Դուք սյունեցու կողքը չեք, դուք խուժանի կողքն եք: Որտեղ հայհոյանք հնչի, սպառնալիք հնչի, ասեն՝ Նիկոլ Փաշինյանին պետք է վերացնել, դուք ասում եք՝ մենք էդ մարդկանց կողքին ենք»,-ասաց Հրաչյա Հակոբյանը:

Աղբյուր` Փաստինֆո