Փաստ ինֆո

Երբ թուրքի հետ սկսում են կառուցողականություն խաղալ, դա հանգեցնում է թուրքի կողմից նոր ախորժակի ձևավորմանը: Այս մասին «Փաստինֆո»-ի հետ զրույցում ասաց «Բարգավաճ Հայաստան» խմբակցության քարտուղար Արման Աբովյանը՝ անդրադառնալով Ալիևի հայտարարությանը, որ իրենք իրագործելու են «Զանգեզուրի» միջանցքի ծրագիրը` անկախ նրանից Հայաստանն ուզում է, թե ոչ:

«Զանգեզուրի միջանցքի ստեղծումը լիովին համապատասխանում է մեր ազգային, պատմական և ապագայի շահերին։ Մենք կատարելու ենք Զանգեզուրի միջանցքի իրականացման խնդիրը, ուզում է Հայաստանը, թե ոչ»,-հայտարարել Է Ալիևը:

Արման Աբովյանի դիտարկմամբ՝ սա սպառնալիք է ոչ միայն Հայաստանին, այլև՝ Ռուսաստանին, և նման սցենարի դեպքում Ռուսաստանն իր բոլոր ռազմական ներուժով ներգրավվելու է Հայաստանի պաշտպանությանը.

«Ալիևը շատ «պստիկ» մարդ է, որ այդ կարգի հայտարարություններ անի։ Փաստացի նա սպառնում է ոչ միայն Հայաստանին, այլ նաև՝ Ռուսաստանին՝ հաշվի առնելով նրա որոշումը, որ եթե վտանգ լինի Հայաստանի տարածքային ամբողջականությանը, ապա ըստ բոլոր երկկողմանի պայմանագրերի, Ռուսաստանն իր բոլոր ռազմական ներուժով ներգրավվելու է Հայաստանի պաշտպանությանը»,-ասաց Աբովյանը:

Պատգամավորի խոսքով՝ ավելի հատկանշական է ՀՀ ներկայիս իշխանությունների արձագանքը, որովհետև բացի ԱԳՆ-ից, որևէ այլ բարձրաստիճան պաշտոնյայից արձագանք չի եղել.

«Խնդիրն այն է  որ ի սկզբանե իշխանությունների գնահատականները և գործողությունների տրամաբանությունը թերի են, չեն համապատասխանում իրական վտանգներին: Երբ բարբարոսի հետ փորձում են հարաբերություններ հաստատել, տեսեք ինչ է ստացվում: Այն կողմից լուրջ և կոշտ սպառնալիքներ, իսկ այս կողմից՝ քողարկված կառուցողականության ներքո ինչ-որ հայտարարություններ են արվում, խաղաղասիրական մտքեր: Իշխանությունները չեն հասկանում, որքան իրենք խաղաղասեր են, այնքան Թուրքիան և Ադրբեջանը ճնշումն ավելացնելու են, նրանք բարբարոս են և վայրենի: Վայրենու հետ հնարավոր չէ խոսել այն տոնայնությամբ, որով իշխանություններն են փորձում»,-ասաց ԲՀԿ քարտուղարը:

Զրուցակցի համոզմամբ՝ նման հայտարարություններ ամեն օր լինելու են, քանի որ Ադրբեջանը և Թուրքիան ՀՀ իշխանությունների գործողությունների տրամաբանությունն ընկալում են, որպես թուլություն և պատրվակ, որպեսզի հավելյալ ճնշում ավելացնեն մեզ վրա:

Հարցին՝ ինչպես է գնահատում ԱԳՆ արձագանքը Ալիևի հայտարարություններին, Աբովյանն ասաց.

«Պետք է ոչ թե ԱԳՆ-ն արձագանքեր, այլ՝ կառավարությունը, քանի որ Ադրբեջանի ԱԳՆ-ն չի սպառնում:ԱԳՆ-ն դիվանագիտական կառույց է և դիվանագիտական կառույցի տրամաբանության ներքո է պատասխանել»:

Պատգամավորն արձանագրում է, որ ճանապարհների ապաշրջափակման մասին հայ պաշտոնյանների և պատգամավորների խոստումներն ընդամենը մանիպուլյացիա են.

«Մեր իշխանություններ ասում են , որ պետք է այնպես անենք, որ բացվեն ճանապարհները, ասում են՝ իրենք կունենան Մեղրիի միջանցք, մենք՝ Զանգեզուրի, սա բացարձակ մանիպուլյացիա է: Ի՞նչու է Մեղրու միջանցքը Ադրբեջանի և Թուրքիայի հիմնական պահանջը, իրենք էլ Արցախից չեն խոսում, միայն միջանցքից են խոսում, որովհետև հենց այդ միջանցքն է առանցքային Թուրքիայի և Ադրբեջանի միավորվելու համար, սա պանթյուրքական պրոյեկտի շրջանակներում է իրականացվում: Երբ մեր իշխանությունները խաբում են, ժողովրդին ասում են՝ կարող է Ադրբեջանը չուզի Մեղրիով միջանցք, հայկական կողմը պետք է հասնի դրան, սա մանիպուլյացիա է, հակառակը ադրբեջանցիներն իրենք ասում են, եթե միջանցք չտվեցիք, կռվով կմտնենք»,-ասաց Արման Աբովյանը։

Դիտարկմանը՝ հնարավո՞ր է թուրք-ադրբեջանական տանդեմը, օգտվելով տարածաշրջանային իրավիճակից, քայլեր ձեռնարկի Սյունիքի ուղղությամբ, Արման Աբովյանը չբացառեց նման սցենար և նկատեց, որ Ադրբեջանը և Թուրքիան փորձում են Ռուսաստանին սադրել.

«Պետք է հաշվի առնել, որ Դոնբասում և Հարավային Կովկասում լարված իրավիճակը փոխկապակցված են: Չմոռանանք, որ Թուրքիան ՆԱՏՕ-ի անդամ է, իսկ Ռուսաստանը փաստացի դիմակայում է ՆԱՏՕ-ին։ Ադրբեջանն էլ, որպես անկախ պետություն գոյություն չունի, թուրքական վիլայեթ է»,-ասաց Արման Աբովյանը:

Պատգամավորի խոսքով՝ հայկական կողմից չստանալով համարժեք գոնե վերբալ պատասխան՝ Ադրբեջանը և Թուրքիան դա ընկալում են որպես թուլություն, այլ ոչ թե որպես կառուցողականություն։

Աղբյուր` Փաստինֆո