Փաստ ինֆո

Ապրիլի 20-ին Արցախի մայրաքաղաք Ստեփանակերտում՝ Թումանյան 99 հասցեում, տեղի ունեցավ հայկական շուկայում արևային էներգետիկայի ոլորտի առաջատար «Sհtigen»  ընկերության մասնաճյուղի բացման պաշտոնական արարողությունը։

Դեռևս պատերազմի օրերին ընկերության ղեկավար, ծննդով արցախցի Հայկ Շեկյանը  հայտարարել էր Արցախում ընկերության մասնաճյուղ բացելու իր որոշման մասին։

Մասնաճյուղի բացումը հնարավորություն կտա ավելի արդյունավետ դարձնել «Sհtigen» ընկերության գործունեությունը՝ Արցախի էներգետիկ կարիքները բավարարելու ուղղությամբ։

Նորաբաց մասնաճյուղի հիմնական նպատակն է իրականացնել Արցախի էներգետիկ անվտանգության և անկախությանն ուղղված համալիր ծրագրեր՝ մասնավոր և պետական սեկտորի լայն ներգրավածությամբ։

Շնորհիվ «Shtigen» ընկերության մասնագետների՝ Արցախի բնակիչներն ու այնտեղ գործունեություն ծավալող ընկերությունները հենց տեղում կստանան մասնագիտական խորհրդատվություն՝ արևային էներգետիկայի, էներգաարդյունավետությունը բարձրացնող լուծումների և էլեկտրամոբիլների շահագործման վերաբերյալ, կկարողանան ցանկության դեպքում ձեռք բերել ժամանակակից սարքավորումներ, որոնք կնվազեցնեն էներգակիրների ծախսը և կապահովեն էներգետիկ արդյունավետություն։

Հայկ Շեկյանը մասնաճյուղի բացման ընթացքում նաև ներկայացրեց «Shtigen»-ի կողմից նախագծված և արտադրվող  «ՇԱԿ-2» անունը կրող մոբիլ արևային կայանները, որոնք նախատեսված են հոսանքազուրկ հատվածներում էլեկտրաէներգիայի արտադրության և մատակարարման արագ կազմակերպման համար։

Նշենք, որ «Shtigen» ընկերության ղեկավար Հայկ Շեկյանը աշխատանքային հանդիպումներ կունենա նաև Արցախի Հանրապետության բարձրաստիճան պաշտոնյաների և գործարար շրջանակի ներկայացուցիչների հետ։

Հանդիպման ընթացքում կքննարկվեն արևային էլեկտրակայանների հնարավորությունները՝ էլեկտրաէներգիայի պակասուրդի լրացման, Արցախի Հանրապետության էներգետիկ անվտանգության բարձրացման, գյուղատնտեսական նշանակության հողերի արդյունավետ կիրառման ուղղությամբ տարվող աշխատանքների համատեքստում:

«Shtigen» ընկերությունը հիմնադրվել է 2011 թ. Երևանում: Այն համարվում է թիվ 1 արևային ընկերությունը 1000 խոշոր հարկատուների ցանկում: Ընկերությունն իրականացնում է նաև մի շարք կրթական ծրագրեր:

Աղբյուր` Փաստինֆո