Փաստ ինֆո

Զարմանալի չէ, որ հենց Նիկոլ Փաշինյանի հանձնարարությամբ են նման քրեական գործերը հարուցվում և ապօրինի քրեական հետապնդում իրականացվում։ Դա ոչ այլ ինչ է, քան հանցագործություն, որն իր մեջ կարող է պարունակել ՀՀ քրեական օրենսգրքի 309-րդ հոդվածով նախատեսված հանցակազմ, պաշտոնեական լիազորություններն անցնելու հանցակազմն ակնհայտ է։ Այս մասին «Փաստինֆո»-ի հետ զրույցում ասաց «Վերածնվող Հայաստան» կուսակցության նախագահ Վահե Հակոբյանի փաստաբան Էրիկ Ալեքսանյանը։

Հիշեցնենք, որ այսօր սյունեցիներն ակցիաներ են իրականացրել Սյունիքում՝ ընդդեմ Նիկոլ Փաշինյանի։ Սյունեցիները գաղտնի ժամանած Փաշինյանին դիմավորել են՝ «Նիկոլ, դավաճան», «կապիտուլյանտ» և այլ վանկարկումներով։ Վերջինս անգամ չի կարողացել մուտք գործել Քաջարան և վերադարձել է Կապան՝ Սյունիքի մարզպետարան, որտեղ կայացած խորհրդակցության ժամանակ հրահանգներ է տվել իրավապահ մարմինների ներկայացուցիչներին՝ կտրուկ քայլեր իրականացնել։ Բացի դա՝ վերջինս հաշվետվություն է պահանջել դատախազության և ՔԿ ներկայացուցիչներից՝ հետաքրքրվելով, թե այսօրվա դեպքերով մարմիններն ինչ գործողություններ են իրականացրել։ Հենց խորհրդակցության ժամանակ հայտնի դարձավ, որ Սյունիքում՝ Նիկոլ Փաշինյանի դեմ տեղի ունեցած ակցիաների կապակցությամբ հարուցվել է քրեական գործ՝ խուլիգանության հատկանիշներով։ Շրջանառվող լուրերի համաձայն՝ այսօր սպասվում են աղմկահարույց ձերբակալություններ՝ ինչպես «ակտիվ» տղաների, այնպես էլ՝ Սյունիքի համայնքապետերի։ Շրջանառվում է հատկապես Մեղրիի համայնքապետի և Սյունիքի նախկին մարզպետ Վահե Հակոբյանի անունները։

Հակոբյանի փաստաբան էրիկ Ալեքսանյանը «Փաստինֆո»-ի հետ զրույցում ասաց, որ վերջին երեք տարիների ընթացքում տեսնում ենք՝ «իրավական գործընթացներ»՝ քաղաքական գործիչների կամ այն մարդկանց նկատմամբ, որոնք ցուցաբերում են սկզբունքայնություն կամ արտահայտում են կարծիք, որոնք չեն համընկնում այսօրվա իշխանությունների հետ, ուստի՝ զարմանալի չէ, որ հենց Նիկոլ Փաշինյանի հանձնարարությամբ են հարուցվում այդ քրեական գործերը։ Փաստաբանը գտնում է, որ այդ վարքագծում առկա են հանցագործության հատկանիշներ, ընդ որում՝ ոչ միայն ՀՀ ՔՕ 309-րդ հոդվածով նախատեսված, այլև՝ կարող է պարունակել հատուկ նորմով նախատեսված հանցակազմ։ Փաստաբանը չբացառեց, որ փաստի առթիվ կներկայացվի հանցագործության մասին հաղորդում։

Ինչ վերաբերում է խուլիգանության հատկանիշներով հարուցված քրեական գործին, փաստաբանը նշեց, որ Սյունիքում տեղի ունեցած հանգամանքները, դրան ներկա գտնվող և մասնակից հանդիսացող անձինք որևէ խուլիգանության հանցակազմին բնորոշ գործողություն չեն կատարել։ Փաստաբանի դիտարկմամբ՝ խուլիգանության հանցակազմն իր առանձնահատկությամբ տարբերվում է այլ հանցակազմերից՝ հենց իր առանձնահատուկ հատկանիշներով, որոնցից ամենակարևորը խուլիգանական մղումն է։ Մասնավորապես, Ալեքսանյանը նշեց, որ խուլիգանության հատկանիշներից ամենակարևորն այն է, որ այն անհարգալից վերաբերմունքը, որը ցուցաբերվում է, անձը պետք է ունենա այն ցուցաբերելու հատուկ նպատակ և եթե կոնկրետ անձի գործողություններն ուղղված են կոնկրետ անձի դեմ, այլ ոչ թե՝ հասարակության, այդ արարքը չի կարող որակվել որպես խուլիգանություն։

«Վճռաբեկ դատարանի նախադեպային որոշումներ են առկա, որտեղ հստակ նշվել է, որ այն արարքը, որն ուղղված է կոնկրետ անձի դեմ, այլ ոչ թե՝ հասարակական անդամների և հասարակության անդամների դեմ, ապա այդ անձի արարքը խուլիգանության հանցակազմով երբեք չի կարող որակվել։ Այսօր սյունեցիների վարքագիծը փաստացի ուղղված էր մեկ անձի դեմ՝ Նիկոլ Փաշինյանի դեմ։ Վերջիններիս գործողություններում որևէ հատկանիշ՝ հասարակական կարգի կոպիտ խախտման տեսանկյունից չկա»,- նշեց Ալեքսանյանը՝ հավելելով, որ երկրորդ հատկանիշն անհարգալից վերաբերմունքի դրսևորման և ցուցադրման նպատակն է, որը նույնպես այդ անձանց գործողություններում չէր երևում, քանի որ այդ անձանց գործողություններն ուղղված էին հենց Նիկոլ Փաշինյանի անձի դեմ՝ պայմանավորված երեք տարվա ընթացքում նրա ցուցաբերած հակաբարոյական վարքի դրսևորմամբ՝ հայ ազգի նկատմամբ։ Ալեքսանյանի խոսքով՝ սյունեցիների արարքը չի ունեցել ինչ-որ չնչին առիթ, որով կցանկանային ընդգծել իրենց եսամոլությունը, առավելությունը։

«Չկար մի անձ, որն իր գործողություններով ցանկանում էր ինքնահաստատվել։ Հստակ երևում էր, որ այդ անձինք, լցված լինելով Նիկոլ Փաշինյանի հակաբարոյական պահվածքով, ուղղակի իրենց կարծիքն արտահայտեցին հրապարակավ, այդտեղ խուլիգանության հատկանիշներ առկա չեն »,- ընդգծեց Ալեքսանյանը։

Հետաքրքրվեցինք՝ արդյոք Վահե Հակոբյանին արդեն հրավիրել են հարցաքննության, Ալեքսանյանը նշեց, որ դեռ չի հրավիրվել, բայց առկա են ստույգ տեղեկություններ առ այն, որ այսօր երեկոյան Նիկոլ Փաշինյանի հանձնարարությամբ՝ նախապատրաստվում են գործողություններ, մասնավորապես, ցանկանում են ձերբակալել Վահե Հակոբյանին և նրա տիկնոջը, ինչն ակնհայտ քաղաքական հետապնդում է։

«Վերջիններիս քաղաքական ակտիվությամբ է պայմանավորված իշխանությունների վարքագիծը, որոնք ցանկանում են ցուցաբերել պարոն Հակոբյանի և նրա ընտանիքի անդամների նկատմամբ»,- նշեց Ալեքսանյանը՝ հավելելով, որ դեռևս հայտնի չէ, թե ինչ քրեական գործի շրջանակներում , ինչ հոդվածով են ցանկանում ձերբակալել Հակոբյանին և նրա կնոջը։ Ալեքսանյանի խոսքով՝ որևէ վախենալու բան չունեն, որովհետև որևէ հանցավոր արարք չի կատարվել Վահե Հակոբյանի և նրա տիկնոջ կողմից։

«Իրավական բեսպրեդելի դեմ պատրաստ ենք պայքարել»,- նշեց Ալեքսանյանը։

Հեղինակ՝ Իզաբել Սահակյան

Աղբյուր` Փաստինֆո