Փաստ ինֆո

Սա Ալիևի հերթական հոխորտացող հայտարարությունն է, մենք պետք է զգոն լինենք, Արցախի մասով էլ տևական ժամանակ Ադրբեջանը խոսեց, հետո հարձակվեց և տեսանք արդյունքը: Այս մասին Փաստինֆո-ի հետ զրույցում ասաց «Լուսավոր Հայաստան» խմբակցության սյունեցի պատգամավոր Սրբուհի Գրիգորյանը՝ անդրադառնալով Ալիևի՝ Զանգեզուրի վերաբերյալ հայտարարությանը.

«Զանգեզուրի միջանցքի ստեղծումը լիովին համապատասխանում է մեր ազգային, պատմական և ապագայի շահերին։ Մենք կատարելու ենք Զանգեզուրի միջանցքի իրականացման խնդիրը, ուզում է Հայաստանը, թե ոչ»,- հոկտեմբերի 20-ին հայտարարել Է Ալիևը:

«Պետք է պատերազմից դասեր քաղենք, աշխարհի ուշադրությունը հրավիրենք Զանգեզուրի վրա, բայց բացի դրանից, ինքներս փորձենք ամեն ինչ անել, որպեսզի մի թիզ հող Սյունիքից Ադրբեջանը չկարողանա ոտնակոխ անել, դրա համար մենք պարզ լուծումներ ենք առաջարկել»:

Պատգամավորը խնդրին երկու լուծում է տեսնում՝ առաջինը Սյունիքում ռուսական ռազմաբազայի ստեղծումն է, երկրորդը՝ մոբիլիզացիան.

«Մենք այս ատելության մթնոլորտում, պառակտված, գույների բաժանված, նախկինների-ներկաների բաժանված, չենք կարող որևէ հաջողության հասնել, եթե հիշում ենք, 90-ականներին, մեր նախնիները կարողացան հաջողության հասնել ՝ օգտվելով Ադրբեջանի ներքին պառակտումներից: Պետք է միասնական լինենք, մեկ բռունցք դառնանք: Միայն խոսելով, իրար վիրավորելով և պոպուլիզմով ոչնչի չենք հասնի, պետք է իրապես գործողություններ լինեն: Մենք ցեղասպանության ենթարկված ազգ ենք, բայց պատմության ընթացքում կարողացել ենք շտկել մեր մեջքը և առաջ գնալ»,-ասաց Սրբուհի Գրիգորյանը:

Պատգամավորի համոզմամբ՝ Ալիևի հայտարարությունները և նման հռետորաբանությունը պատերազմում ունեցած հաջողության հետևանքն է.

«Ժողովրդական մի խոսք կա՝ ատամն արդեն կտրել է, այսինքն՝ իրեն հաջողվել է հարց լուծել բռնության ճանապարհով, ցեղասպանության ենթարկելով, արցախցիներին տեղահանելով: Հիմա էլ փորձում են Սյունիքով միջանցքի հարց լուծել, բնական է , որ սյունեցիները դրա դեմ ընդվզելու են և պայքարի տարբեր ձևերով հանդես են գալու: Դա անում են ոչ միայն հանուն Սյունիքի, այլ հանուն Հայաստանի»,-ասաց Սրբուհի Գրիգորյանը:

Ինչ վերաբերում է Ալիեւի հոխորտանքներին՝ ՀՀ ԱԳՆ-ի արձագանքին՝ պատգամավորն այն բավարար չի համարում.

«ԱԳՆ-ն փորձեց մի քիչ կոշտ հայտարարությամբ պատասխանել, դա քիչ է, ԱԳՆ պատասխանը բավարար չէր, բայց ոնց հասկանում եմ, իրենց հնարավորությունը դա է: Ես ԱԳՆ-ի աշխատանքի մեջ էներգիա չեմ տեսնում, պետք է զգանք, որ պատերազմից հետո դիվանագիտությունը սկսել է ակտիվ աշխատել: Եթե դիվանագիտությունը չաշխատի, մշտապես պատերազմների մեջ ենք հայտնվելու:

Մենք այլևս ժամանակ չունենք: Թշնամին արդեն հասել է Սյունիք, սահմաններն այնքան են մոտեցել, հիմա էլ Ալիևը հոխորտում է Զանգեզուրի, Երևանի մասին: Մենք գիտեինք, որ հաջորդ քայլը լինելու է Զանգեզուրը, գիտեինք Ադրբեջանի ախորժակը և դրա մասին մշտապես ասել ենք, իսկ եթե Սյունիքի հետ ինչ-որ բան լինի, հաջորդ քայլը լինելու է Երևանը և մենք կորցնելու ենք Հայաստանը»,-ասաց պատգամավորը:

Անդրադառնալով Փաշինյանի Սյունիք կատարած գաղտնի այցին և սյունեցիների ընդվզումներին, սյունեցի պատգամավորն ասաց.

«Փաշինյանը Սյունիք գնալիս չի անցել այն ճանապարհով, որով քաղաքացիները սովորաբար գնում են Կապան, Մեղրի, այլ ընտրել է շրջանցիկ ճանապարհը: Երկրի առաջին դեմքը պետք է կիսի բոլոր դժվարությունները, որոնք ժողովուրդ ունի, եթե շրջանցում է դժվարությունը, ուրեմն խնդիր կա: Սյունեցիներն այլ բան, քան ընդվզել այն ղեկավարի դեմ, որի ժամանակ տեղի է ունեցել այս խայտառակ պարտությունը, չէին կարող: Սահմանները հասել են Սյունիք, հիմա նույնիսկ քարով կարող են խփել Կապանին, սյունեցիք նաև իրենց ինքնապաշտպանակն ներքին մղումներով են ընդվզում այս իշխանության դեմ: Սյունիքում այլ կերպ հնարավոր չէ, սյունեցին պայքարել է և պայքարելու է ոչ միայն Սյունիքի, այլ՝ ամբողջ Հայաստանի համար»,-ասաց Սրբուհի Գրիգորյանը:

Հարցին՝ ինչպես է գնահատում, որ երկրի ղեկավարը Սյունիք այցելում է գաղտնի, առանց նախապես այցի մասին տեղեկատվության, պատգամավորն արձագանքեց.

«Ուզում եմ հավատալ, որ Փաշինյանը գաղտնի է այցելել Սյունիք, որպեսզի հարևան պետությունները չիմանան, այլ տրամաբանական բացատրություն չունեմ»:

Աղբյուր` Փաստինֆո