Փաստ ինֆո

Մալաթիա -Սեբաստիա վարչական շրջանում՝ Հաղթանակի ամառանոցային առաջին տարածքում, պետք է կառուցվեր Գեւորգյանների տունը, երբ ավագ որդին վերադառնար ծառայությունից։ Պատերազմը կտրեց զինվորի՝ Նարեկ Գեւորգյանի կյանքի թելը եւ բազմազավակ հայրը՝ որդուն սգալուն զուգահեռ որոշեց կատարել նրան տրված խոստումը ու նրա 4 քույրերի ու եղբոր համար տուն կառուցել, սակայն իշխանությունները դա էլ թույլ չտվեցին ։

Զոհված զինծառայող Նարեկ Գևորգյանի հոր կառուցած տան հիմքը քանդել են՝ ասելով, թե ապօրինի տարածք է, այնինչ Ռոման Գևորգյանը պնդում է, որ 40 տարի է այդ հողատարածքն իրենց է պատկանում։ Տան շինարարությունը սկսվել էր մոտ երկու ամիս առաջ։ Մոտ երեսուն միլիոն դրամ էր ներդրել։

Ռոման Գևորգյանը «Փաստինֆո»-ին պատմեց, որ կառավարությունից առաջարկել էին՝ չշարունակել շինարարությունը մինչեւ թղթաբանական հարցերը լուծվեն, ու մինչ նա զբաղվել է թղթաբանությամբ՝ պայմանավորվելուց 20 օր հետո տեսել է, որ առանց իրեն զգուշացնելու շենքի հիմքը քանդել են։ Գևորգյանն ասում է՝ տունը կառուցելու համար ծախսել էր նաև զոհված որդու համար տրված փոխհատուցման գումարը, ցանկացել էր, որ որդին իր լուման ունենա տան կառուցման գործում, իսկ քաղաքապետարանից քանդել են՝ իմանալով, որ շինությունը հերոսի տուն է լինելու։

«Այն, ինչ ինքը պետք է աներ, ես եմ անում։Ով կարող է Ազգային հերոսի տունը քանդի, իր անունից ուղարկեն ու տուն քանդեն՝ թուրք է։ Իրենք թող չմոռանան, որ այսօր իրենք այս հողին կանգնած են մեր երեխեքի արյան գնով։ Այն գումարն է, որը իր արյամբ է վաստակել, դրել շինարարություն ենք արել , գալիս տեսնում եմ՝ քաղաքապետարանից, ոստիկանությունից մտել են տրակտորով քանդում են տունը»։

Նարեկը մահացել է հոկտեմբերի 7-ին, սակայն դին հունվարի 23-ին են գտել, երբ աճյուններ են տեղափոխվել ադրբեջանական գյուղերից մեկից։ Հունվարի 25-ին դիերը տեղափոխել են Երևան, իսկ հինգ օր անց ՝ հունվարի երեսունին, նրան վերջին հրաժեշտը տվել։ Հենց այս օրը Նարեկը պետք է զորացրվեր։

Արցախի հերոս և ազգային հերոս է Նարեկը։ Հիմա հայրը՝ կնոջ և չորս զավակների հետ ապրում է փոքր տան մեջ։ Ինքն է տան միակ կերակրողը։ Ինքնուրույն փորձել է տեսքի բերել տունը, սակայն դա չի օգնում խոնավությունից ճաքող տան պատերն ամրացնել կամ ամուր տանիք ունենալ։ Դա էր նաև պատճառը, որ զավակին կորցրած ընտանիքը նոր տուն էր ուզում կառուցել, ինչը թույլ չեն տվել իշխանությունները։

Մանրամասները՝ տեսանյութում

Աղբյուր` Փաստինֆո