Փաստ ինֆո

Ես քննադատել եմ պատգամավոր Արթուր Մանուկյանին, որը նաև իմ մտերիմ ընկերն է, քանի որ գտնում եմ, որ նա սխալ բան է ասել և նման հայտարարություն անելով խնդիրներ է ստեղծում։ Ինձ թվում է՝ նա ինձ հետ համաձայնվել է։ Այս մասին լրագրողների հետ զրույցի ժամանակ ասաց ԱԻՊԾ նախկին փոխտնօրեն Բորիս Ավագյանը։

«Ես երեկ արտահայտել եմ իմ կարծիքը որպես ՀՀ քաղաքացի։ Իմ ընկերն ինձանից չի նեղացել, և ես չեմ հասկանում, թե ինչու են դա ընդունում որպես քաղաքական հայտարարություն։ Մենք քննարկում էինք, որ քաղաքական և էմոցիոնալ կողմը պետք է մի կողմ դնել, որ չխանգարեն գերիների վերադարձի գործընթացին։ Մտածեցի, որ որպես հայ մարդ իրավասու եմ ասել, որ իմ ընկերն ավելորդ հայտարարություններ է անում։ Ի՞նչ եք կարծում, երբ ոմն ՔՊ-ական, Ավանի թաղապետի տեղակալ գրառումներ է անում ռուսական խաղաղապահ ուժերի հրամանատարի վերաբերյալ և չի քննադատվում, հրատապ աշխատանքից չեն հանում»,-ասաց Բորիս Ավագյանը։

Հարցին՝ Արցախում տեղյա՞կ էին, որ ինքը խորհրդարանում պետք է մասնակցեր նման քննարկման, Բորիս Ավագյանը նկատեց՝ որտեղ է գրված, որ ինքը պետք է տեղյակ պահեր, որ պատգամավորների հետ արդի հարցերն է քննարկում.

«Դրա մեջ օրենքի խախտում կա՞։ Դա աշխատանքային հանդիպում էր, նրանք խորհուրդ են հարցնում։ Մամուլի ասուլիս չէի տալիս։ Ես քաղաքական հայտարարություն չեմ արել։ Ասել եմ, որ անթույլատրելի է պատասխանատվությունը դնել ռուսական կողմի վրա, նշել եմ, որ «Իմ քայլ»-ի պատգամավորը չպետք է նման հայտարարություն աներ, ինչպես նաև հորդորել եմ Ավանի փոխթաղապետին ռուսական խաղաղապահ ուժերի հրամանատարի վերաբերյալ գրառումներ չկատարի»,-նշեց Բորիս Ավագյանը։

Աղբյուր` Փաստինֆո