Փաստ ինֆո

Բնակչության մեծ մասը ոչ թե չի կողմնորոշվել, թե առաջիկա արտահերթ ընտրություններում, որ քաղաքական ուժի օգտին է քվեարկելու, այլ ընտրազանգվածը վստահ չէ, որ ընտրություններ տեղի կունենան։ «Փաստինֆո»-ի հետ զրույցում նման կարծիք է հայտնել Գիտությունների ազգային ակադեմիայի Փիլիսոփայության, սոցիոլոգիայի և իրավունքի ինստիտուտի տնօրեն Գևորգ Պողոսյանը:

«Փաստինֆո»-ն այս օրերին պարբերաբար հարցախույզ է իրականացնում բնակչության շրջանում՝ պարզելու դիրքորոշումը, թե արդյոք տեսնում են այն քաղաքական ուժին, որը կարող է երկիրը հանել ներկայիս ճգնաժամից։ Հարցման մասնակիցները գրեթե միաձայն պնդում են, որ լուրջ մարտահրավերների առաջ ենք կանգնել, դեմ ճանապարհների ապաշրջափակմանը, թուրքերի հետ բարեկամացմանը, սակայն քաղաքական ուժի ընտրության հարցում դեռեւս սպասողական դիրքորոշում չեն որդեգրել։

«Այս պահին բնակչության մեծ մասը ոչ թե չի կողմնորոշվել, այլ ընտրազանգվածը պարզապես դեռ վստահ չէ, որ Հայաստանում կանցկացվեն ընտրություններ: Բնակչությունը սկսում է կողմնորոշվել, հետևել կուսակցություններին և քաղաքական դեմքերին այն ժամանակ, երբ սկսվում է պաշտոնական քարոզարշավը»,-«Փաստինֆո»-ի հետ զրույցում ասել է Պողոսյանը եւ նկատել, որ քանի դեռ պաշտոնական քարոզարշավը չի հայտարարվել՝ միամտություն է, սպասել, որ հանրությունը կկողմնորոշվի: «Ընտրազանգվածի քաղաքական մոբիլիզացիան կսկսվի այն ժամանակ, երբ պաշտոնապես կհայտարարվի ընտրությունների մասին»,- ընդգծել է նա:

Բանախոսը ասել է, որ ֆեյսբուքյան գրառմամբ ընտրություններ չեն նշանակում, այն իրավաբանական ուժ չունի։

«Նախ և առաջ ես կարծում եմ, ճիշտ կլիներ, որպեսզի արտահերթ ընտրությունների մասին լիներ Ազգային ժողովի որոշումը, կամ նախագահի հրամանագիրը, այլ ոչ թե ֆեյսբուքյան գրառումը»,-արձանագրել է Գևորգ Պողոսյանը:

Ըստ Սահմանադրության՝ ընտրությունների մասին որոշումը ընդունում է Ազգային ժողովը, իսկ հաստատում՝ ՀՀ նախագահը, քանի դա չի արվել, մենք կարող ենք միայն ենթադրել, որ հունիսին լինելու են ընտրություններ: «Եվ մտածող զանգվածի մոտ հնարավոր ընտրությունների անցկացումը լուրջ չի ընդունվում», - ասաց Պողոսյանը:

Հետեւապես նա նաեւ վաղաժամկետ է համարում վերլուծություններն առ այն, որ ընտրությունների ժամանակ լինելու է երկու բևեռ՝ որոնցից մեկը Քոչարյանն է, իսկ մյուսը՝ Փաշինյանը։

«Առհասարակ այս երկու բևեռների մասին հիմնականում խոսում են լրագրողները և քաղաքագետները: Այսինքն՝ դա գալիս է վերլուծական համայնքից, այլ ոչ թե բնակչությունից: Եթե մենք խոսենք բնակչության հետ, կհասկանանք որ նրանք դեռ չեն ընկալում այս երկու բևեռները: Սա քաղաքական հնարք է»,- կարծում է Պողոսյանը:

Վերջին օրերին Փաշինյանը տարբեր մեսիջներ է փոխանցում հանրությանը՝ թուրքերի հետ բարեկամանալու, ճանապարհները ապաշրջափակելու, զինվորական ծառայության ժամկետը կրճատելու մասին։ Ինչ ազդեցություն են դրանք թողնում ընտրազանգվածի վրա՝ «Փաստինֆո»-ի հարցին ի պատասխան՝ սոցիոլոգը նկատեց․

«Փաշինյանի վերջին հայտարարությունը ծառայության կրճատման մասին հերթական նախընտրական պոպուլիստական քայլ էր, այն կարելի է ընկալել պարզապես որպես հայտարարություն: Քանի որ, եթե այս հարցը իսկապես լուրջ քննարկվի մասնագետների կողմից, պարզ կդառնա, որ մենք կարիք ունենք ոչ թե ծառայությունը նվազեցնելու, այլ ընդհակառակը ավելացնելու և վճարովի ծառայությունը ընդլայնելու:

Բանակաշինության հարցում մենք դեռ շատ անելիքներ ունենք, հաշվի առնելով այն փաստը, որ գտնվում ենք ռիսկային գոտում»:

«Ինչ վերաբերվում է ճանապարհներ բացելուն, ապա այս փաստը նույնպես բացասական է ընդունվում քաղաքացիների կողմից: Երևի Փաշինյանը քաղաքական պայմանավորվածություններ ունի, որոնք նա խոստացել է իրականացնել, այս պատճառով նա տանում է այս օրակարգը: Սակայն ինչքանով է դա բխում Հայաստանի ազգային շահերից, դժվար է ասել»,- եզրափակեց Պողոսյանը:

Հեղինակ՝ Անի Մշեցյան

Աղբյուր` Փաստինֆո