Փաստ ինֆո

ԵԱՀԿ Մինսկի խմբի համանախագահների մի քանի օր առաջ տարածած հայտարարությամբ ընդգծվում էր Ղարաբաղի հարցի կարգավորման անհրաժեշտությունը՝ այդպիսով փաստելով հիմնախնդրի չկարգավորված լինելը, - Զառիթափ համայնքի բնակիչների հետ հանդիպման ժամանակ ասել է ՀՀ վարչապետ Նիկոլ Փաշինյանը:

Ըստ նրա` Ադրբեջանը փորձում էր ներկայացնել, թե Ղարաբաղի հարցն այլեւս լուծված է, որ Ղարաբաղի հարց չկա: Բայց համանախագահներն ընդգծեցին, որ հարցը պետք է կարգավորվի, ընդ որում կողմերին հայտնի սկզբունքների և էլեմենտների հիման վրա: «Ես ուզում եմ հիշեցնել, որ այդ էլեմենտներից կարևորագույնն Արցախի ժողովրդի ինքնորոշման իրավունքն է: Եվ կարող ենք արձանագրել, որ միջազգայնորեն պահպանվել է Արցախի ժողովրդի ինքնորոշման իրավունքը, ու դա նաև մեր տղաների կյանքի և հերոսության գնով»,- հայտարարել է Նիկոլ Փաշինյանը:

Նա եւս մեկ անգամ ընդգծել է, որ Հայաստանի և Արցախի անվտանգությունը երեկ, այսօր առավել ևս հենված է հայ-ռուսական ռազմաքաղաքական դաշինքի, գործընկերության վրա: «Եվ ուզում եմ ընդգծել, որ մեր անվտանգային համակարգի կարևորագույն բաղադրիչներից մեկը հայ-ռուսական համատեղ զորախումբն է, ինչի տրամաբանությամբ նշանակում է, որ հարձակումը Հայաստանի վրա նշանակում է հարձակում Ռուսաստանի վրա», - ասել է Նիկոլ Փաշինյանն ու ավելացրել, որ Արցախում խաղաղապահ ուժերի տեղակայումն անվտանգության էական երաշխիքներ է ավելացնում Արցախի համար:

Նա նշել, որ հայ-ռուսական բարեկամությունը, գործընկերությունն ամուր է, ինչպես միշտ է ամուր եղել, ինչպես շարունակելու է ամուր մնալ: Ռուսաստանը մեր դաշնակից պետությունն է: «Ռուսաստանը մեր եղբայր պետությունն է, բայց կրկին ուզում եմ արձանագրենք՝ Ռուսաստանն Ադրբեջանի թշնամին չէ և Ադրբեջանն էլ Ռուսաստանի թշնամին չէ: Ռուսաստանը Հայաստանի նկատմամբ կատարել է իր բոլոր պայմանագրային պարտավորությունները, որովհետև անվտանգային այն մեխանիզմը, որն ունեցել ենք, տարածվել է Հայաստանի Հանրապետության վրա, Հայաստանի Հանրապետության սահմաններից ներս», - ասել է Նիկոլ Փաշինյանը:

Աղբյուր` Փաստինֆո