Փաստ ինֆո

Խորհրդարանում արտահերթ ելույթ ունեցավ փոխխոսնակ Լենա Նազարյանն ու որոշեց անդրադառնալ իշխող ուժին և վարչապետին հնչեցված քննադատություններին։ Նազարյանն ասում է ՝ մեղադրանքները հերիք չէ հակասական են, այլև փաստական հիմք չկա։ Նկատեց, որ չեն խուսափում հարցերից: Վարչապետը օրենքի համաձայն գալիս է Ազգային ժողով եւ բոլոր հարցերին տալիս պարզաբանումներ: 

«Սակայն պատերազմի պատճառների եւ ընթացքի վերաբերյալ խոսակցության մեջ ամենամեծ բարդությունն այն է, որ մեղադրական բնույթի հարցեր տվողները հակասում են իրենց»:

Նազարյանը հիշեցրեց, որ «Լուսավոր Հայաստան» խմբակցության գործընկերները հաճախ են հակասական հարցեր բարձրաձայնում՝ մեկ հայտարարում են, որ վարչապետը գեներալների կարծիքն է լսել, չնայած գերագույն գլխավոր հրամանատար էր, մեկ հայտնում որ նոյեմբերի 9-ի հայտարարությունը միանձնյա է որոշել, ոչ մեկի կարծիքի վրա չի հենվել։ Նազարյանը հարցրեց՝ ինչո՞ւմ են մեղադրում՝ միանձնյա գործելո՞ւ, թե կարծիքներ հաշվի առնելու համար։

«Այս կերպ ոչ մի կերպ չեք օգնում, որ պատերազմի եւ դրա բացահայտման ընթացքի պատճառները հասկանալի դառնան: Ավելի եք խճճում: Դուք չեք զգում այս բեռը եւ, քանի որ պատասխանատվություն չեք զգում, ձեզ թույլ եք տալիս լինել անպատասխանատու: Խճճել ու տարամեկնաբանել եք ամեն ինչ»։

Նազարյանը մեկ այլ դրվագ էլ հիշեցրեց, որ պատերազմից հետո «Իմ քայլից» դուրս եկած պատգամավորը իրենց մեղադրում է, որ պարտությունը իշխող ուժինն է, մոռանալով, որ պարտության ամբողջ ընթացքում խմբակցութան անդամ էր։

«Մեղադրում են, ասում՝ Քարվաճառը հանձնեցիք ու հաջորդիվ մեղադրում զոհերի համար։ Հիմա կողմնորոշվեք՝ մեղադրում եք, որ Քարվաճառը առանց մի կրակոցի է հանձնվել, թե որ կրակոցներից մարդիկ են զոհվել։ Կողմնորոշվեք, եթե իհարկե, ձեր նպատակը կողմնորոշվելն է։ Ես չեմ հավատում, որ ձեր նպատակն այս բարդագույն, անմարդկային պատերազմի պատճառներն ու ընթացքի հանգամանքները հասկանալն է ու ծանր հարցերից տառապող մարդկանց օգնելը: Ես համարում եմ, որ դուք ոչ մի բեռ ձեզ վրա վերցրած, ոչ մի պատասխանատվություն ինքներդ ստանձնած չեք զգում եւ ուզում եք պարզապես ինքնամոռաց մեղադրել, մեղավոր նշանակել, բոլոր մեղքերի համար մի թիրախ գտնել: Սա է ձեր նպատակը»:

Նա նաեւ անդրադարձավ ԼՀԿ ղեկավար Էդմոն Մարուքյանի ելույթին, որն ասել էր, թե Օնիկ Գասպարյանը պատերազմի 4-րդ օրն ասել է, որ պարտվում ենք, բայց վարչապետը պատերազմը չի կանգնեցրել, բայց հիմա կա հնարավորություն, որ Մարուքյանն անձամբ լսի ձայնագրությունը, տեսնի՝ ինչ է խոսվել ԱԽ նիստերում:

«Մարուքյանն ասում է՝  որ ծանոթանանք, ի՞նչ եմ ձեզ ասելու, նկատի ունենալով, որ միեւնույն է իրավունք չունի իմացածը հրապարակելու: Մեզ ոչ մի բան մի ասեք, պարոն Մարուքյան, բայց կարող է վարչապետից այլոց գործողությունների կամ անգործության մասին էլ հարցեր առաջանան: Չեք ուզում իմանալ ճշմարտությունը, որովհետեւ ուզում եք շարունակել մեղադրել մի հոգու: Գուցե պատճառն այն է, որ եթե պարզվի, որ այդ մի հոգին չի մեղավոր կամ միայն այդ մի հոգին չի մեղավոր, ստիպված լինեք կամ լռել, կամ ընդունել, որ այս պատմության մեջ կան այլ պատասխանատու դերակատարներ: Ձեզ պետք է մեկ մեղավոր, մեկ թիրախ, դուք խնդիր չունեք պարզելու իրականությունը, որովհետեւ չեք զգում ոչ բեռ, ոչ պատասխանատվություն»,-հայտարարեց Լենա Նազարյանը:

Աղբյուր` Փաստինֆո