Փաստ ինֆո

Աշխարհում կորոնավիրուսով վարակման հաստատված դեպքերի թիվն անցած յոթ օրվա ընթացքում ավելացել է մոտավորապես 5,2 մլն-ով, ինչը գրեթե 20 տոկոսով ավելի է, քան մեկ շաբաթ առաջ: ՏԱՍՍ-ի հաշվարկներով՝ վարակվածների թիվը հունվարի կեսերից ի վեր առաջին անգամ գերազանցել է 5 միլիոնը եւ առավելագույն ցուցանիշն է եղել 2020 թվականի դեկտեմբերից ի վեր:

Իրավիճակը շարունակում է բարդանալ այն երկրներում, որոնք աշխարհում առաջին տեղն են զբաղեցնում հիվանդացածների թվով՝ ԱՄՆ - ում, Հնդկաստանում, Բրազիլիայում։ Ընդհանուր առմամբ պանդեմիայի ընթացքում կորոնավիրուսը հայտնաբերել են 139,2 մլն մարդու մոտ, այսինքն՝ յուրաքանչյուր 55-րդ բնակչի մոտ։

Նոր վարակից մահացությունը նույնպես կտրուկ աճել է. փետրվարից ի վեր առաջին անգամ մեկ շաբաթում մահացել է ավելի քան 80 հազար հիվանդ: Մահվան ելքերի ընդհանուր թիվը, ՏԱՍՍ-ի հաշվարկներով, գերազանցել է 3 միլիոնը:

Ընդ որում, այսպես կոչված ակտիվ դեպքերի թիվը, այսինքն՝ այն հիվանդների, որոնք բուժում են անցնում հենց հիմա, մեկ շաբաթվա ընթացքում նվազել են միանգամից 5 մլն-ով՝ հասնելով 18 մլն-ի, սակայն դրանք թերի տվյալներ են, քանի որ ոչ բոլոր երկրներն են համապատասխան վիճակագրություն հրապարակում։

Աղբյուր` Փաստինֆո