Փաստ ինֆո

Սյունիքի մարզի Քարահունջ գյուղում սահմանազատման հետևանքով այգիներից ու արոտավայրերից հատվածներ կանցնեն թշնամու վերահսկողության ներքո, ինչի պատճառով գյուղացիները ստիպված կլինեն հեռագնա անասնապահությամբ զբաղվել։

«Փաստինֆո»-ի հետ զրույցի ժամանակ Քարահունջի գյուղապետ Լուսինե Ավետյանն ասաց, որ սահմանազատման աշխատանքները դեռ չեն իրականացվել և սահմանները հստակ նշված չեն, սակայն արդեն պարզ է, որ արոտավայրերից ու այգիներից որոշ մաս մնալու է հակառակորդի հսկողության տակ. «Դեռ մի կերպ արածացնում են անասուններին, բայց արոտը հաստատ չի բավականացնի։ Երևի հեռագնա կանենք, ուրիշ տարբերակ չունենք։ Հիմա գյուղացիները, հովիվներն ուշադիր են, որ անասունները սահմանը չանցնեն։ Այս ընթացքում եղել է, որ անասունները մոտենան ադրբեջանական կողմի սահմանին, բայց խաղաղապահները զգուշացրել են, այնպես որ անասունների կորուստ չունենք»,-նշեց Լուսինե Ավետյանը՝ հավելելով, որ թեև խոշոր ֆերմերները քիչ են, բայց ընդհանուր առմամբ անասնապահությամբ զբաղվողների թիվը գյուղում զգալի է, ինչը նրանց ապրուստի միակ միջոցն է։ Ընդ որում` արդեն եղել են գյուղացիներ, որոնք վաճառել են իրենց անասուններին։

Գյուղապետը նշում է՝ քանի որ հստակ սահմանազատում չկա, բնակիչները, հովիվները չգիտեն՝ որ սահմանն է մերը, որը՝ թշնամունը. «Երեկ մեր հովիվներն ասում էին, որ ադրբեջանցի են տեսել, սկզբում չեն հասկացել՝ ում սահմանում են։ Զինվորական հագուստով երկու ադրբեջանցի են եղել, մերոնց տեսել ու փախել են։ Հետո նկարներ ուղարկեցին, դիտարկում արեցինք ու հասկացան, որ իրենց սահմանում են եղել»,-ասաց Լուսինե Ավետյանը։

Նրա խոսքով մարզպետարանից հավաստիացրել են, որ ստեղծվել է հանձնաժողով, որն առաջիկայում գյուղ առ գյուղ կգնա և կիրականացնի սահմանազատման աշխատանքները։

Հարցին՝ արդյոք բնակիչները գյուղից գնալու մտադրություն ունե՞ն, գյուղապետն ասաց, որ այս պահին դեռ նման տրամադրվածություն չկա, սակայն եթե այսկերպ շարունակվի, չի բացառում, որ գյուղը լքողներ կլինեն. «Դեռ մարդիկ էլ հստակ պատկերացում չունեն՝ ինչ անեն, ինչպես անեն։ Ամեն դեպքում տուն, տեղ ունեն այստեղ, դժվար թողնեն ու գնան»,-նշեց Լուսինե Ավետյանը։

Վերջինս, սակայն, կարծում է, որ անվտանգային խնդիրներ կլինեն, քանի որ անասուններին արածացնելու ժամանակահատվածը նոր է սկսել, այս պայմաններում այն բարդ է լինելու. «Անասուններ են անցնելու, դժվար է լինելու այդքանը վերահսկել։ Բնակիչն իր սահմանը հստակ չգիտի։ Գուգլով նայում են, բայց հստակ ոչ մի գծանշում, ոչ մի բան չկա»,-ասաց գյուղապետը։

Աղբյուր` Փաստինֆո