Փաստ ինֆո

Քաղաքացին պատերազմում վիրավորվել է, երկու օր ստացիոնար բուժվել, սակայն հայրենասիրությունից դրդված՝ չի շարունակել բուժումը և մեկնել է ռազմաճակատ, շարունակել իր կռիվը։ Ինչ-որ չափանիշ է սահմանված, 3 օր և ավելի ստացիոնար բուժում ստացողները այդ աջակցություններից օգտվում են, իսկ այն քաղաքացիները, որոնք չեն սպասել բուժման ավարտին, դուրս են մնում ծրագրերից։ Այս մասին ԱԺ-ում՝ դիմելով փոխվարչապետ Մհեր Գրիգորյանին, ասաց ԼՀԿ պատգամավոր Սրբուհի Գրիգորյանը:

«Խնդրում եմ այլ մեխանիզմներ մշակել, որ այդ քաղաքացիները նույնպես կարողանան օգտվել 500 հազար դրամի աջակցությունից»,-ներկայացրեց պատգամավորը։

Մհեր Գրիգորյանն էլ ասաց, որ նման ցանկացած դեպքի վերաբերյալ տեղեկացնեն Կառավարությանը, որպեսզի կարողանան շուտափույթ լուծում տալ:

«Բարդ հարց եք բարձրացնում, որը վերաբերում է շահառուների նույնականացման կանոններին, բայց կան բաղադրիչներ, որոնց գնահատականը պետք է տրվի առանձին։ Պատկերացնու՞մ եք, որ 3 օրվա փոխարեն դնենք 1 օր, կամ ընդհանարապես պահանջ չդնենք ստացիոնար բուժման, մենք կունենանք շահառուների անկառավարելի շրջանակ և ի վիճակի չենք լինի ոչ ֆինանսական, ոչ կազմակերպչական այդ միջոցառումն իրականացնել։ Այդ դեպքում ցանկացած անձ, որը կունենա վնասվածք, կհանդիսանա նաև շահառու»,-ասաց նա։

Պատգամավորն էլ առաջարկեց աջակցություն տրամադրելիս առաջնորդվել ոչ թե ստացիոնար բուժման օրերով, այլ վիրավորման ծանրությամբ և բժշկի եզրակացությամբ:

Աղբյուր` Փաստինֆո