Փաստ ինֆո

Խորհրդարանում փոխվարչապետ Մհեր Գրիգորյանը ներկայացրեց Արցախի աջակցության ծրագրերը, որոնք շուրջ երկու տասնյակ են:

Առաջին միջոցառումը անհայտ կորած զինծառայողների ընտանիքներին ամսական 500 հազ. դրամ  տրամադրելու 6 ամսյա ծրագիրն է: Այս պահին նույնականացված շուրջ 600 ընտանիք արդեն կա և փաստացի վճարված գումարի ընդհանուր չափը կազմել է 1 մլրդ դրամ:

Խեղում ստացած զինծառայողներին տրամադրվող աջակցության շրջանակներում եռապատկվում է զինհիմնադրամի տրամադրած 100 000-ական դրամը: Կա նույնականացված 265 շահառու, իսկ օգտագործված միջոցների չափը կազմում է 200 մլն դրամ:

Հաջորդ միջոցառումը հյուրընկալ ընտանիքներին տրամադրվող աջակցության ծրագրերն են: Միջոցառման շահառուների թիվը 8410 է, այս պահի դրությամբ շուրջ 1.1 մլրդ դրամ վճարվել է ծրագրի համար:

Ուսումնական տարվա մեկ կիսամյակի վճարի փոխհատուցման ծրագրի շրջանակում այս պահի դրությամբ կա 4210 շահառու և վճարված՝ 900 մլն դրամ:

Մահացած քաղաքացիական անձանց ընտանիքներին և վիրավորում ստացած քաղաքացիական անձանց աջակցության ծրագրի շրջանակում 56 նույնականացված շահառու կա և՝ 200 մլն դրամի չափով վճարված գումար, իսկ վիրավորում ստացած զինծառայողների աջակցության շրջանակում այս պահի դրությամբ կա 6500 շահառու և վճարված՝ 3.3 մլրդ դրամ:

Սյունիքի մարզի Շուռնուխ և Որոտան համայնքների բնակիչներին տրամադրվող աջակցության ծրագրի շրջանակում 35 ընտանիք շահառու է գրանցված և վճարվել է շուրջ 15 մլն դրամ:

Հաջորդը՝ Արցախում հաշվառված անձանց ծրագիրն է, որը նախարարի խոսքով, ամենամեծ ծրագիրն է: Կա շուրջ 77.420 հաշվառված, նույնականացված շահառու և փաստացի վճարված է 5.3 մլրդ դրամ:

Արցախի վերահսկողությունից դուրս մնացած համայնքների բնակիչներին նախատեսված աջակցության համար նույնականացվել է 33.981 շահառու, վճարվել է շուրջ 10 մլրդ 200 մլն դրամ:

Վերջին միջոցառումը Արցախի մինչև 5 տարեկան երեխաներին աջակցությունն է, որի շրջանակներում հաշվառված է շուրջ 13.873 երեխա, միջոցառման ծախսը կազմել է 300 մլն դրամ:

«Արցախի կառավարությանը ևս տրամադրվել է շուրջ 6 մլրդ դրամի ֆինանսական աջակցություն՝ դրամաշնորհի և փոխառության տեսքով»,-տեղեկացրեց Մհեր Գրիգորյանը և հավելեց, որ Արցախի մասով կա 3 մեծ ծրագիր՝ սոցիալական աջակցության, բնակարանի ապահովման և վնասների հատուցման:

Փոխվարչապետը նաև հայտնեց, որ Արցախի աջակցության ծրագրերի շահառուների թիվը գերազանցում է 150.000-ը:

Աղբյուր` Փաստինֆո