Փաստ ինֆո

Շատ է շահարկվել, թե ի՞նչ է տեղի ունեցել հոկտեմբերի 19-ին և դրանից հետո: Վերլուծելով իրադրությունը և խորհրդակցելով Արցախի նախագահի եւ ԶՈՒ գլխավոր շտաբի հետ՝ ես որոշել եմ, որ մենք պետք է որոշակի ծանր զիջումների ճանապարհով հասնենք հրադադարի: Այդ կապակցությամբ հրավիրել եմ Անվտանգության խորհրդի նիստ, որին մասնակցել են խորհրդարանական խմբակցությունների ներկայացուցիչները, այդ թվում՝ ընդդիմադիր։ Այս մասին ԱԺ-ում հայտարարել է Նիկոլ Փաշինյանը:

«Նիստին ասել եմ, որ խորհրդարանական ընդդիմության ներկայացուցիչներին հրավիրել եմ ոչ թե նրանց հետ պատասխանատվություն կիսելու, այլ ուղղակի նրանց տեղեկացնելու համար, որովհետեւ այս պահին տեղի ունեցողի վերաբերյալ չեմ կարող հրապարակային հայտարարություն անել, որովհետեւ եթե հանկարծ հակառակ կողմը չընդունի մեր առաջարկը, այդ հայտարարությունները մեր ընդհանուր իրադրության վրա դրական չեն ազդի: Անվտանգության խորհրդի այդ նիստին մասնակցել են Հանրապետության նախագահը և Վեհափառ Հայրապետը»,-իր ելույթում ասել է Փաշինյանը։

Նիկոլ Փաշինյանը նաև նշեց, որ այդ ամենից հետո, համաձայն պայմանավորվածության, զանգահարել է ՌԴ նախագահին և ասել, որ ուզում ենք հրադադար՝ տարածքների՝ 5+2 ձեւաչափով վերադարձի պայմանով, որը նախկինում էլ միջնորդների կողմից Հայաստանի Հանրապետությանը առաջադրված է եղել ամենատարբեր ֆորմատներով:

«Եղել է նաև փախստականների՝ ադրբեջանցի ներքին տեղահանվածների վերադարձի հարց է եղել Լեռնային Ղարաբաղ, ես ասել եմ, որ մենք սկզբունքորեն այդ հարցի հետ կապված առարկություն չունենք, չենք ունենա, եթե մենք հարցը ինչ-որ կերպ փոխկապակցենք Լեռնային Ղարաբաղի կարգավիճակի ճշգրտման պրոցեսի հետ:

Որից հետո Ռուսաստանի Դաշնության նախագահն ունեցել է խոսակցություն Ադրբեջանի նախագահի հետ, ինչի արդյունքում պարզ է դարձել, որ ադրբեջանական կողմը կտրականապես չի ընդունում Հադրութի շրջանի դեօկուպացիայի մեր առաջարկը և երկրորդը՝ պահանջում է, որպեսզի ներքին տեղահանվածների վերադարձի հարցը, այդ թվում՝ Շուշի, որեւէ ձեւով չկապվի կարգավիճակի ճշգրտման հետ: Սա նոր դետալ է, որը ես պետք է ասեմ, նախկինում չեմ ասել այս դետալի մասին, նաեւ ակնարկ է եղել այն մասին, որ ոչ թե պետք է լինի 5+2 բանաձեւով տարածքների վերադարձ գումարած սրան, այլ պետք է լինի 7 տարածքների վերադարձ: Դա ասվել է որպես ակնարկ այն դեպքի համար, եթե մենք մինչեւ այս կետը առաջադրված պայմաններին համաձայնենք»,- ասել է Փաշինյանը:

Նրա խոսքով՝ Ադրբեջանը ինչպես պատերազմից առաջ, այնպես էլ պատերազմի ընթացքում, ըստ էության, չի ընդունել Լեռնային Ղարաբաղի կարգավիճակի ճշգրտման օրակարգը: Խնդրում եմ ուշադրություն դարձրեք, այսինքն․ «Ադերբեջանն ընդհանրապես կտրականապես իքս պահից հրաժարվել է օրակարգ մտցնել կամ ավելի ճիշտ, օրակարգային հարցի կարգավիճակով քննարկել Լեռնային Ղարաբաղի կարգավիճակի հարցը, եւ սա եղել է 2016 թվականի 4-օրյա և 2020 թվականի 44-օրյա պատերազմի հիմնական պատճառը»,-ասաց Նիկոլ Փաշինյանը։

Աղբյուր` Փաստինֆո