Փաստ ինֆո

Դահլիճը ողջունեց վարչապետի այն խոսքը, որ Արցախում ապագա կա և դա շատ կարևոր է թե՛ Արցախի, թե՛ Հայաստանի ժողովուրդների համար, որովհետև մենք բոլորս պետք է այնպես անենք, որ Արցախի ժողովուրդը զգա, որ այնտեղ երաշխիքներ կան ապրելու համար։ Այս մասին այսօր ԱԺ-ում լրագրողների հետ զրույցում ասաց «Իմ քայլ»-ը խմբակցության պատգամավոր Հովհաննես Իգիթյանը:

Պատգամավորն ընդգծեց, որ ինքը ողջունել է Փաշինյանի այն համոզմունքը, որ նույնիսկ այս իրավիճակում հնարավոր է այնպես անել, որ Արցախն ապագա ունենա։ Իգիթյանի համոզմամբ՝ ոչ մի քաղաքական ուժ կամ անհատ առանձին չի կարող ապահովել թե Արցախի, թե Հայաստանի ապագան․

«Կա մի նախադասություն, որը պետք է ընդունելի լինի բոլորի համար և այստեղից դուրս եկած մեսիջը դառնում է ամբողջ աշխարհի հայության մեսիջը, և եթե դառնում է մեր հայության օրակարգը, մենք կհաջողենք:

Օրինակ՝ Վազգեն Մանուկյան, Ռոբերտ Քոչարյան կամ Սերժ Սարգսյան, դուք ուզում եք լինել վարչապետ, դա ձեր գործն է, ես ոչ կարող եմ ողջունել, ոչ կարող եմ մերժել ձեր ցանկությունը, ժողովուրդը դա կորոշի:

Ըստ կարևորության և առաջնահերթության պետք է գրենք հարցերը և դրանց շուրջ համաձայնության գանք։ Օրինակ ԼՂ դեօկուպացիայի հարցը կարևոր է և եթե Հայաստանում բոլոր քաղաքական ուժերն այս հարցի շուրջ համաձայնության գան՝ անկախ նրանից ընտրություններ կլինեն, թե ոչ, կհասկանանք, թե այս իրավիճակում ինչ կարելի է փրկել»,- ասաց Իգիթյանը։

Պատգամավորը նաև կարծում է, արտահերթ ընտրությունները չեն լուծելու ստեղծված ճգնաժամային վիճակը։

Աղբյուր` Փաստինֆո