Փաստ ինֆո

Հայկական կողմը 20 տարվա ընթացքում բանակցությունների շուրջ ունեցել է մի խնդիր՝ անընդհատ հույս ներշնչել Ադրբեջանին, որ նա բանակցությունների արդյունքում կհասնի այն բանին, ինչին ուզում է։ Այս մասին խորհրդարանում հայտարարեց ՀՀ վարչապետ Նիկոլ Փաշինյանը։

Վարչապետն անդրադարձավ ՀՀ երկրորդ նախագահ Ռոբերտ Քոչարյանի՝ 2020թ.-ի դեկտեմբերի 5-ին «5-րդ ալիք»-ին տված հարցազրույցին և մեջբերեց մի հատված. «Հարցազրույցում նա հայտարարել է, որ «կարելի է մի շարք օրինակներ բերել, և այս ամենը համադրության մեջ միասին ստեղծել է մի վիճակ, երբ դու Ադրբեջանին շանս չես թողել հույս պահելու, որ դիվանագիտական ճանապարհով ինքը կարող է որևէ բանի հասնել, իսկ եթե նման շանս չես թողնում, մնում է պատերազմը»։ Սա ուղղակի հանճարեղ նախադասություն է, որն արտահայտում է հայկական կողմի 20-ամյա դիվանագիտությունը և բանակցային տրամաբանությունը։ Այսինքն հայկական կողմը բանակցությունների շուրջ ունեցել է մի խնդիր՝ անընդհատ հույս ներշնչել Ադրբեջանին, որ նա բանակցությունների արդյունքում կհասնի այն բանին, ինչին ուզում է, իսկ ինքն ուզում է, որ Ղարաբաղտ լինի իր կազմում՝ մշակութային կամ որևէ ինքնավարության կարգավիճակում, իսկ եթե հնարավոր է՝ նույնիսկ առանց դրա։ Եթե դու 20 տարի անընհատ հույս ես տալիս, գալիս է պահը, երբ այդ հույսը պետք է արդարացնես»,-ասաց վարչապետը։

Վերջինս նշեց, որ դա ամենամեծ ձախողումն է, երբ ժողովրդին ներշնչվել է, որ պետք է հրաժարվենք մեր բոլոր իրավունքներից և Արցախյան շարժման արդյունքներից։ Շրջանառության մեջ է դրվել ամենաանհեթե թեզը, որ կարելի էր դնել, այն է՝ ամենավատ բանակցություններն ավելի լավ են, քան ամենալավ պատերազմը. «Ավելի մեծ անհեթեթություն դժվար էր հորինել։ Էլ չեմ ասում, որ հենց Ռոբերտ Քոչարյանի ժամանակներում 1997-1998թթ.-ին ոչ միայն անընդհատ հույս են տվել Ադրբեջանին, որ կհասնի իր նպատակին, այլև երաշխքի են տվել։ Այդ երաշխիքը Ղարաբաղը բանակցային գործընթացից դուրս թողելն էր։

Առանց Ղարաբաղի բանակցությունների գնալն Ադրբեջանին երաշխիք է եղել, որ նրանք հույս ունենան՝ հասնելու են իրենց նպատակին։ Ռոբերտ Քոչարյանն ասում է, որ եթե վարչապետը թուրքական գործակալ լիներ, կաներ այն ամենը, ինչ արվել է։ Եթե Ռոբերտ Քոչարյանը լիներ թուրքական գործակալ և 1997-1998թթ.-ին եթե Հայաստանը ղեկավարեին թուրքական գործակալներ, ամենամեծ ծառայությունը, որ կարող էին մատուցել Ադրբեջանին, Ղարաբաղը բանակցային գործընթացից դուրս թողնելն էր՝ երաշխքի տալով, որ նրանք ներքուստ Ղարաբաղը համարում են Ադրբեջանի մաս։ Եթե Ռոբերտ Քոչարյանը թուրքական գործակալ լիներ, նրա օրոք Հայաստանի խորհրդարանում կգնդակահարեին Վազգեն Սարգսյանին և Կարեն Դեմիրճյանին, որովհետև ում, եթե ոչ թուրքական գործակալի օրոք կարող էր դա լինել։ Եթե ԱԱԾ-ն 1999-ին ղեկավարվեր թուրքական գործակալի կողմից, այո կգնդակահարեին»,-ասաց Նիկոլ Փաշինյանը։

Աղբյուր` Փաստինֆո