Փաստ ինֆո

Երեկ Մինսկի խմբի համանախագահները համապատասխան հայտարարությամբ են հանդես եկել, նաև պատրաստակամություն են հայտնել՝ միջնորդելու քաղաքական երկխոսության վերականգնման հարցում: Կցանկանայի այս հարցում լսել ձեր դիտարկումները և հնարավոր երկխոսության վերականգնման վերաբերյալ ձեր մոտեցումները: ԱԺ-Կառավարություն հարցուպատասխանի ժամանակ ԱԳ նախարար Արա Այվազյանին նման հարց ուղղեց իմքայլական պատգամավոր Տաթևիկ Հայրապետյանը: 

ԱԳ նախարարն էլ նշեց, որ Մինսկի խմբի համանախագահների հայտարարության մեջ համանախագահները հստակ ընդգծել են, որ ժամանակն է ուշադրություն դարձնել հակամարտության վերջնական, համապարփակ և կայուն կարգավորման վրա.

«Համանախագահները փաստում են, որ նոյեմբերի 9-ի եռակողմ հայտարարության ոչ բոլոր դրույթներն են կյանքի կոչվել և կոչ են անում քայլեր ձեռնարկել մարդասիրական իրավունքի շրջանականերում գերիների և պահվող այլ անձանց անհապաղ հայրենադարձության, Արցախ մարդասիրական կազմակերպությունների մուտքի և մշակութային, կրոնական ժառանգության պաշտպանության վերաբերյալ»,-ասաց Արա Այվազյանը:

Նախարարի խոսքով՝ հայտարարությունը Մինսկի խմբի համանախագահների կոչն է Ադրբեջանին՝ կատարել նոյեմբերի 9-ի եռակողմ համաձայնագրով իրեն վերապահված հանձնառությունները և հրաժարվել ապակառուցողական դիրքորոշումներից.

«Համանախագահները կոչ են անում անհապաղ բարձր մակարդակով սկսել խորհրդակցություններ: Հայաստանը երբեք չի խուսափել հանդիպումներից, բայց որպեսզի այդ հանդիպումները տեղի ունենան, նախ պետք է ստեղծել պայմաններ նվազագույն վստահության համար և ձևակերպել հստակ օրակարգ:

Ադրբեջանը իր ռազմատենչ, ապակառուցողական, հայատյաց հայտարարություններով և դիրքորոշումներով խոչընդոտում է նման մթնոլորտի ձևավորմանը և ես կարծում եմ, որ ուժեղ համանախագահությունը կարող է նպաստել այդ վստահության մթնոլորտի ձևավորմանը, առավել թիրախային հասցեագրել կողմերից մեկին, այս դեպքում Ադրբեջանին, որ պետք է զերծ մնալ հակահայկական, այս թշնամական քարոզչությունից և գործողություններից»,-ասաց Արա Այվազյանը:

Աղբյուր` Փաստինֆո