Փաստ ինֆո

ՀՀ վարչապետ Նիկոլ Փաշինյանն այսօր խորհրդարանում մեջբերեց 2016թ.-ի նոյեմբերի 17-ին ՀՀ երրորդ նախագահ Սերժ Սարգսյանի ռուսական լրատվական գործակալությանը տված հարցազրույցից հատված։

«Մենք մի քանի անգամ մոտ էինք ստորագրելու փաստաթուղթը, որտեղ բոլոր այդ սկզբունքները հստակ արտացոլված էին։ Այսինքն հայկական կողմը՝ Հայաստանն ու Լեռնային Ղարաբաղը, թողնում են այն տարածքները, որոնք ներկայումս զբաղեցված են որպես անվտանգության գոտի։ Այն տարածքները, որոնց մասին ադրբեջանցիներն ասում են, որ դրանք օկուպացված են և անվանում են բռնազավթված ադրբեջանական 7 շրջաններ։

Այն տարածքները, որոնք ադրբեջանցիներն անվանում են բռնազավթված։ Թողնում ենք այդ տարածքները, հեռանում։ Այսինքն դա տարածքային ամբողջականության սկզբունքն է, բայց առաջին կետում հստակ գրված էր, որ Լեռնային Ղարաբաղի վերջնական իրավական կարգավիճակը որոշվելու է ԼՂ ժողովրդի ազատ կամարտահայտման միջոցով, այնուհետև գրված էր՝ ով է մասնակցելու, ինչպիսի օրակարգ է։ Լրագրողը հարց է տալիս՝ այսինքն հանրաքվե։ Սերժ Սարգսյանը պատասխանում է՝ այո, հանրաքվե։ Հենց դա է եղել ինքնորոշման սկզբունքի մարմնավորումը, բայց ամեն անգամ ադրբեջանական կողմը նոր պահանջներ էր առաջարկում»,-ասաց վարչապետը՝ մեջբերելով Սերժ Սարգսյանի հարցազրույցից հատված։

Նիկոլ Փաշինյանը նշեց, որ ստացվում է՝ բանակցային գործընթացում հասել ենք մի տեղ, երբ հայկական կողմն ասում է՝ Ադրբեջան 7 շրջանները քեզ եմ վերադարձնում, իսկ Ադրբեջանն ասում է, որ ավելին պիտի տա. «Սրա մասին վկայում է Սերժ Սարգսյանի ևս մեկ հարցազրույց, որ նա տվել է 2017թ.-ի հուլիսի 16-ին «Արմենիա» հեռուստաընկերությանը։ Սերժ Սարգսյանն ասում է. «Ապրիլյան պատերազմը ցույց տվեց, որ Ադրբեջանը հրաժարվում է խնդրի լուծման մադրիդյան տարբերակից, և դա հասկանալի դարձավ բոլորին։ Ադրբեջանի դիրքորոշումն էլ պարզ է։ Նա ասում է, որ Լեռնային Ղարաբաղի խնդիրն Ադրբեջանի ներքին գործն է, այսինքն Ղարաբաղն Ադրբեջանի բաղկացուցիչ մասն է և այդպիսին պետք է շարունակի մնալ»։ Այս մեջբերումներն արեցի՝ ցույց տալու, որ այն, ինչ ասել եմ ԱԺ-ում պատգամավորի հարցին ի պատասխան, դա ոչ թե իմ գնահատականն է եղել, այլ բանակցության օբյեկտիվ դրություն, որն ապացուցվում է բազմաթիվ փաստերով, այդ թվում այս մեջբերումներով»,-ասաց վարչապետը։

Աղբյուր` Փաստինֆո