Փաստ ինֆո

«Մարտի 1»-ի գործն ամբողջ ծավալով փակվեց, թե այն ամբողջ ծավալով իսկապես բացահայտված էր։ Ձեր իշխանության հայտնի ջանքերի արդյունքում ձևավորված ՍԴ որոշման, ապա՝ դատարանի համապատասխան որոշման հետևանքով պարզվեց, որ Ռոբերտ Քոչարյանն իրականում անմեղ էր, թե Մարտի 1-ի գործն իրականում չի բացահայտվել։ Հայտնի այդ ողբերգությունը, 10 զոհերը, երկիրը ցնցման հասցրած իրադարձությունն ինչպես է մեկնաբանվում այսօր։ Այս մասին ԱԺ-ում հայտարարեց անկախ պատգամավոր Տիգրան Ուրիխանյանը՝ դիմելով Փաշինյանին։
Վերջինս էլ արձագանքեց՝ նշելով, որ պետք է ոչ թե դատաստան, այլ՝ արդարադատություն, արդարություն։

«Ֆրանկոն մի այսպիսի արտահայտություն ունի՝ ընկերներին ամեն ինչ, թշնամիներին՝ օրենք։ Եթե մենք ուզենայինք դատաստան, կանեինք դատաստան, բայց մենք երբեք չենք ուզել և չենք ուզի դատաստան»,- նշեց նա՝ հավելելով, որ իրենք հավատում են իրենց գաղափարներին, դրա համար էլ տուժում են, հավատում են անկախ դատական համակարգին, բայց Հայաստանում կան դատավորներ, որոնք իրենք էլ չեն հավատում անկախ դատական համակարգին։

Փաշինյանը հայտարարեց, որ «Մարտի 1»-ի գործը համարում է բացահայտված, չգիտի այդ քրեական գործի հատորներն ինչ կարգավիճակ ունեն հիմա, բայց այդ նյութերը կան, չեն այրվելու և ինչ-որ մի պահի կունենան մի կարգավիճակ, որ կարող են ուղղակի հրապարակվել։

«Դուք կտեսնեք, որ Մարտի 1-ի գործն ամենայն մանրամասնությամբ բացահայտված է, հիմա այդ բացահայտումը Քրեական օրենսգրքի որ հոդվածին է համապատասխանում, որ հոդվածին՝ չի համապատասխանում, որ հոդվածն է սահմանադրական, որը՝ հակասահմանադրական, դա ուրիշ թեմա է»,- հայտարարեց Փաշինյանը՝ հավելելով, որ իրավական գնահատական տալն իր գործառույթի մեջ չի մտնում և հենց դա է ամբողջ խնդիրը։

Աղբյուր` Փաստինֆո