Փաստ ինֆո

Կա ավելի մեծ հանցագործություն, քան գիրք չկարդալն է։ Դա գիրք չկարդացող և գիտելիքն արհամարհող մարդկանց իշխանություն տալն է։ ԱԺ-ում այս մասին ասաց «Լուսավոր Հայաստան» խմբակցության պատգամավոր Տարոն Սիմոնյանը։

«Այս հանցագործության համար մարդը հատուցում է իր սերունդներին դժբախտացնելով, իսկ եթե այդ հանցագործությունը կատարում է ազգը, ապա նա հատուցում է սեփական արժանապատվությամբ։ Քաղաքական չարիքն ասպարեզ չի գալիս սատանայի հագուստով, նա գալիս է բազմահազար ծափողջույններով և սիրո մեծ պոռթկումներով։ Կեղծ ազնվությամբ գալով քաղաքական ասպարեզ՝ բարձր գոռացողները խաբում են մարդկանց և արհեստական բախում հրահրում ազնվության և գիտելիքի միջև։ Մինչդեռ մոռանում ենք, որ չկա ազնվություն առանց գիտելիք, չկա առաքինություն առանց գիտելիք։ Քաղաքական չարիքները հեշտ են բարձրանում քաղաքական աստիճանավանդակով, որովհետև նրանք չունեն բարոյականություն և սկզբունքայնություն, և այդ դատարկությունը լրացնում են ազգի արժանապատվության հաշվին՝ սերունդներին դժբախտացնելով»,-ասաց պատգամավորը։

Վերջինս նկատեց՝ չեն կարող Քրեական օրենսդրության մեջ փոփոխություն կատարել և քրեորեն հետապնդելի դարձնել տգիտությունը և տգիտությանն իշխանություն տալը, սակայն կարող են մշակութային մակարդակով որոշել, որ տգիտությունը մահացու մեղք է, իսկ տգիտությանն իշխանություն տալը՝ մեծագույն չարիք. «Ամեն անգամ, երբ ազգերը քաղաքական իշխանություն են տալիս տգիտությանը, նրանք հատուցում են սեփական արժանապատվությամբ»։

Աղբյուր` Փաստինֆո