Փաստ ինֆո

Քրեական հեղինակություն համարվող Արտյոմ Հարությունովը՝ Արտյոմ Կանևսկին արդարացվել է։ Երեկ Երևանի ընդհանուր իրավասության դատարանը՝ դատավոր Մնացական Մարտիրոսյանի նախագահությամբ, արդարացման դատավճիռ է կայացրել։ Այս մասին «Փաստինֆո»-ի հետ զրույցում ասաց փաստաբան Հովսեփ Սարգսյանը։

Հիշեցնենք, որ քրեական հեղինակությունը մեղադրվում էր ապօրինի զենք պահելու մեջ։ Ըստ մեղադրանքի՝ Կանեւսկոյը իր կողմից օգտագործվող «Տոյոտա» մակնիշի ավտոմեքենայի մեջ ապօրինի պահել է Մյասնիկ Մատինյանի անվամբ հաշվառված, կրակելու համար պիտանի ակոսափող հրազեն հանդիսացող որսորդական ինքնաձիգ՝ իր պահեստատուփով, գործարանային արտադրության փամփուշտներ։ Նրա նկատմամբ որպես խափանման միջոց էր ընտրվել չհեռանալու մասին ստորագրությունը: Քրեական գործով դատաքննության ավարտից հետո մեղադրող դատախազ Հայկ Խաչատրյանը հիմնավորված է համարել առաջադրված մեղադրանքը և դատարանին միջնորդել Հարությունովին դատապարտել ազատազրկման՝ 1 տարի 6 ամիս ժամկետով։ Պաշտպանության կողմն էլ միջնորդել էր՝ արդարացնել Հարությունովին։

Հարությունովը նույնպես հերքել է իր առնչությունը մեղսագրվող արարքին։

«Իր առնչությունը հերքված էր ամբողջ քրեական գործի տվյալներով։ Ի սկզբանե ամբողջ դատական և մինչդատական վարույթի ռեսուրսն անհիմն հարուցված քրեական գործով վատնվեց և տևական ժամանակ տևած դատաքննության արդյունքում անձն արդարացվեց, մինչդեռ՝ ի սկզբանե հայտնի էր, որ այդ գործով երբեք չէր կարող մեղադրական դատական ակտ կայացվել»,- նշեց փաստաբանը։

Նրա խոսքով՝ ի սկզբանե բոլոր տեսակի դատավարական գործողությունները, որոնք վարույթ իրականացնող մարմինը քրեական վարույթի նախաձեռնման պահից սկսված՝ կատարվել են ապօրինի, հակաօրինական և անօրինական։

Հարցին՝ արդյոք բարոյական վնասի փոխհատուցման պահանջ կներկայացվի, փաստաբանը նշեց, որ ՀՀ քրեական դատավարության օրենսգրքի 66-րդ հոդվածի կարգով փոխհատուցում պահանջելու իրավունքը վերապահված է Արտյոմ Հարությունովին, այդ հարցի պատասխանը կարող է տալ նա։

Փաստաբանն այդ հարցը դեռևս չի քննարկել վստահորդի հետ։

Հեղինակ՝ Իզաբել Սահակյան

Աղբյուր` Փաստինֆո