Փաստ ինֆո

Ես հավատացած եմ, որ մեր պետությունը, մեր երեխաները ու նրանց սերունդները շատ ավելի երկար ու երջանիկ են ապրելու այս տարածաշրջանում, քան Ալիևը ու նրա ֆաշիստական, այլատյաց, մարդասպան համակարգը կգոյատևի: Այս մասին ԱԺ-ում ելույթի ժամանակ ասաց ԱԺ փոխնախագահ Լենա Նազարյանը՝ անդրադառնալով նախօրեին Բաքվում բացված ռազմական ավարի պուրակի բացմանը.

«Մարդասպանության վայրագություններն իր ժողովրդին ու ողջ աշխարհին ի ցույց դնելով՝ Ալիևը մարտահրավեր է նետել ողջ քաղաքակիրթ աշխարհին, որտեղ ընդունված են պատերազմների ու ցեղասպանությունների զոհերի հիշատակը վկայակոչող պուրակներ ու թանգարաններ, այլ ոչ թե տեղի ունեցած բարբարոսությունները»,-ասաց Լենա Նազարյանը:

ԱԺ փոխնախագահը նշեց, որ սրանով չպետք է թիրախավորվի տարածաշրջանում խաղաղ ապրելու ձգտումները.

«Ի՞նչ անել, երբ հարևան երկիրը նվիրագործում է պատերազմ, նվիրագործում է մարդասպանությունն ու այլատյացությունը:

Պետք է իրավական, քաղաքական, միջազգային գործիքներով ոչ միայն խայտառակ անել նման գարշելի երևույթը և դրա հեղինակին, այլև ի հեճուկս Ալիևի շարունակել ներդնել մեր անկեղծ ջանքերը մեր տարածաշրջանը անվտանգ դարձնելու համար: Ես հավատացած եմ, որ մեր երեսուն տարվա պետությունը ունի կամք, ու կարողություն հաղթելու տարածաշրջանում ֆաշիզմը, այլատյացությունը ու ավտորիտարիզմը: Ալիևն ամբողջ աշխարհին ցույց է տվել, թե ինչպես է սպանել մարդկանց, մենք պետք է ցույց տանք թե ինչպես կհաղթենք ֆաշիզմը մեր տարածաշրջանում, որտեղ ապրում ենք ու շարունակելու ենք ապրել:Խաղաղություն պետք է լինի, այս տարածաշրջանի բոլոր ժողովուրդներին՝ ի հեճուկս Ալիևի, կամ առանց Ալիևի»,-ասաց ԱԺ փոխխոսնակը:

Աղբյուր` Փաստինֆո