Փաստ ինֆո

Իմ գրոտեսկային համեմատությունը վերաբերել է մի պատգամավորի, որը դավաճանել է իր քաղաքական թիմին, դավաճանել է այն ընտրողներին, որոնք իրեն ձայն էին տվել՝ լինելու նեցուկ այս քաղաքական թիմին: Եթե ես դավաճանեմ իմ քաղաքական թիմին ու ինձ ձայն տվողներին, նման համեմատությունը տեղին կլինի նաև իմ նկատմամբ: Այս մասին այսօր ԱԺ-ում լրագրողների հետ զրույցում ասաց «Իմ քայլը» խմբակցության նորընտիր պատգամավոր Վահագն Ալեքսանյանը՝ անդրադառնալով իր հայտարարությանը, որտեղ պատգամավոր Սոֆյա Հովսեփյանին «Իմ քայլը» խմբակցությունը լքելուց հետո համեմատել էր ուսապարկի հետ:

Նորընտիր պատգամավորի խոսքով՝ իրենց հիմա դավաճանության մեջ են մեղադրում մարդիկ, ովքեր տարիներ շարունակ զբաղվել են թալանով.

«Այդ մարդկանց լկտիությունը հասել է այն աստիճանի, որ ծաղրում են վարչապետին՝ զինվորներին թարմ միրգ տալու համար, ասում են՝ ելակով է բանակ պահում: Եփած ցորենով երևի պիտի պահեր: Դուք բոլորդ տեսել եք դավաճանության մեջ մեղադրողների դղյակները, վստահ եմ բոլորդ եք տեսել»,-ասաց Վահագն Ալեքսանյան:

Վերջինիս համոզմամբ՝ պատերազմն անխուսափելի էր, քանի որ նոր իշխանությունը ժառանգել էր փակուղում գտնվող բանակցային գործընթաց.

«Ես շատ լավ եմ հիշում, թե ինչպես էին նախկինները պահում այն բանակը, որը պիտի պահեր մեր հողերը: Ես շատ լավ եմ հիշում, թե ինչպես էինք մենք ինչ-որ մարզական միջոցառման գնալիս, ժամերով կանգնում փողոցի մեջտեղը և սպասում, որ պոլիգոն կոչված իրենց դարն ապրած մեքենաները վերջապես աշխատեն»,-ասաց Վահագն Ալեքսանյանը:

Դիտարկմանը, թե նախկին իշխանություններն ասում են՝ մենք թալանչի էինք, բայց կարողանում էին Արցախ պահել, իսկ նոր իշխանության վատ կառավարման արդյունքում Արցախը հանձնվեց, Վահագն Ալեքսանյանն արձագանքեց.

«Կատարյալ հիմարություն է, հատկապես եթե չեմ սխալվում բանակում առանց մեկ օր ծառայելու փոխգնդապետի կոչում ստացած Արմեն Աշոտյանն էր նաև վերջերս նման հայտարարությամբ հանդես եկել, ինչը համարում եմ պղծություն բանակի նկատմամբ»,-ասաց Վահագն Ալեքսանյանը:

Աղբյուր` Փաստինֆո