Փաստ ինֆո

Միամտաբար կարծում էի, որ «Իմ քայլ»-ի ներսում կլինեն որոշ ողջամիտ պատգամավորներ, որոնք Խունդկարյան-Շաթիրյան-Վաղարշյան եռյակին այստեղ կրծքով պաշտպանելու համար ներողություն կխնդրեին մեր հանրությունից։ Խորհրդարանում այս մասին ասաց ԱԺ անկախ պատգամավոր Արման Բաբաջանյանը։ 

«Հույս ունեի, որ որոշ պատասխանատուներ առնվազն ինքնակամ կհրաժարվեին իրենց զբաղեցրած պաշտոններից։ Մարտի 1-ի գործով Սահմանադրական դատարանի հայտնի որոշումը, դրան հաջորդած դատարանի կայացրած որոշումը գործող իշխանության՝ Մարտի 1-ի բացահայտմանը սպասող հասարակության պարտությունն էր ու Ռոբերտ Քոչարյանի և նրա փաստաբանական թիմի ռևանշիզմի հաղթանակը։ Հայաստանում չկա որևէ ողջամիտ մարդ, որ կարող է կարծել, թե որևէ դատարան կարող է սրբագրել այդ զարհուրելի հանցագործությունը։ Որևէ մեկը հույս չունենա, թե հնարավոր է մոռանալ մարտի 1-ն ու Քոչարյանի դերակատարությունը մարտի 1-ին»,-ասաց Արման Բաբաջանյանը։

Պատգամավորը հույս հայտնեց, որ իրենց կհաջողվի բացահայտել տեղի ունեցածի ողջ պատկերը։ Արման Բաբաջանյանի խոսքով ՍԴ-ի որոշումը գործող իշխանության երկչոտության, ամլության վկայությունն է. «Փաստ է, որ ՍԴ-ի որոշումից հետո հին համակարգը փորձելու է առաջիկա ընտրություններում հասնել ռևանշի և ռեստավրացնել հին համակարգը։ Ձեռնոցը նետված է, հիմա կոնսոլիդացվելու, արդյունավետ ձևաչափեր ստեղծելու խնդիր ունեն բոլոր այն ժողովրդավարական ուժերը, որոնց համար գերնպատակ է Հանրապետությունն ու նրա ինքնիշխանությունը»,-ասաց Արման Բաբաջանյանը։

Աղբյուր` Փաստինֆո