Փաստ ինֆո

Մի քանի ավիացիոն մասնագետներ պատրաստվում են դատական հայց ներկայացնել Քաղաքացիական ավիացիայի կոմիտեի և ՔԱԿ նախագահ Տաթևիկ Ռևազյանի դեմ։

«Փաստինֆո»-ի հետ զրույցում ավիացիայի ոլորտի փորձագետ Նավիկ Խաչատրյանն ասաց, որ չի կարծում դա որևէ հեռանկար կունենա։ Նավիկ Խաչատրյանը նկատեց՝ բոլորը գիտեն, որ այս ընթացքում Տաթևիկ Ռևազյանի կողմից ոլորտում բացթողումներ են եղել, սակայն ներկայիս դատական համակարգով պայմանավորված նման դատական հայցը չի կարող  ապագա ունենալ։

«Նախորդ տարի ավիացիոն փոքր գործի շրջանակներում շփվեցի քննչական, դատական մարմինների հետ և շատ դժգոհ եմ։ Ամբողջ ընթացքում տարան-բերեցին, իսկ հետո գործ չհարուցեցին այն պարագայում, երբ ակնհայտ փաստեր կային։ Այս դեպքում էլ վստահաբար չեմ կարող ասել, որ դատի կտան։ Եթե արտահերթ խորհրդարանական ընտրություններ լինեն, նոր մարդիկ գան իշխանության, ավելի հայրենասեր լինեն ու նորից սկսեն ոլորտը վերակառուցել, միգուցե հնարավոր լինի նման սցենար։ Հիմա մեծ շանսեր չեմ տեսնում»,-ասաց փորձագետը՝ հավելելով, որ Տաթևիկ Ռևազյանը կոմիտեում կունենա իրավաբաններ, որոնք կօգնեն գործը կարճել և չբացահայտել։

Նավիկ Խաչատրյանի խոսքով գործող օրենքներով Հայաստանի՝ սև ցուցակում հայտնվելու հետ կապված ՔԱԿ-ին դատի տալ հնարավոր չէ. «Կոմիտեն պետք է անցներ աուդիտը, բայց չի անցել և դրա հիման վրա չեն կարող դատի տալ։ Եթե օրենքում գրված լիներ, որ աուդիտը չանցնելու դեպքում ինչ-որ հետևանք է լինելու, միգուցե ստացվեր։ Ամեն դեպքում Տաթևիկ Ռևազյանը երեք տարվա ընթացքում շատ կիքսեր են թույլ տվել»,-նշեց Նավիկ Խաչատրյանը։

Դիտարկմանը, որ մասնագետները նշում են՝ Տաթևիկ Ռևազյանը շատ սխալներ է թույլ տվել և էլ ավելի վատացրել ավիացիայի վիճակը, Նավիկ Խաչատրյանը նկատեց՝ ինչպես վարչապետը պատերազմից հետո ասաց, որ ինքը համար մեկ պատասխանատուն է, սակայն ոչ համար մեկ մեղավորը, այնպես էլ Տաթևիկ Ռևազյանը կանի. «Կասի՝ ես պատասխանատու եմ, բայց միայն ես չեմ մեղավոր։ Կգցեն նախկինների վրա։ Նրանք էլ ոլորտի հետ կապված որոշ գործառույթներ պետք է անեին, բայց երևի չեն արել»,-ասաց փորձագետը։

Վերջինս ընդգծեց՝ օրենքները, կոմիտեի կանոնադրությունը չեն համապատասխանում ներկայիս տենդենցներին և համաշխարհային ավիացիայի զարգացմանը, հետևաբար որևէ մեկը, ով իր վրա կվերցնի Հայաստանի ավիացիան վերակենդանացնելու պարտականությունը, առաջին հերթին պետք է ուշադրություն դարձնի օրենսդրական դաշտին. «Պետք է մանրամասն ուսումնասիրվի, աուդիտ իրականացվի, որի հիման վրա փոփոխություններ նախաձեռնեն»։

Աղբյուր` Փաստինֆո