Փաստ ինֆո

Ռուբեն Հախվերդյանի երգի այս տողերը ճիշտ Երևանի քաղաքապետարանի համար են։ Իհարկե, ասել, թե այսօր միայն քաղաքային իշխանությունն է անտերության մատնել քաղաքը, սխալ կլինի, քանի որ «բեսպրեդելը», անտերությունը բոլոր ոլորտներում հիմնական գործող անձինք են։ Իսկ կոնկրետ Երևանի քաղաքապետարանում վաղուց մոռացված է՝ ի՞նչ ասել է քաղաքաշինական նորմեր, ի՞նչ ասել է՝ բանուկ, նոր բարձրահարկերով բնակեցված թաղամասերը միմյանց կապող ճանապարհ, որը բավական է կանգառասրահներ չունի, դեռ մի բան էլ՝ երկկողմանի մայթազուրկ է, այսինքն, մարդ և մեքենա անվտանգ քայլելու և երթևեկելու խնդիր ունեն այստեղ։

Խոսքն այս դեպքում Լենինգրադյան 23/11 շենքն օղակող ճանապարհի զավթմանն է վերաբերվում։ Անհնար է պատկերացնել, թե այս կարգի անոմալ որոշում կարող էր ծնվել Երևանի քաղաքապետարանում, եթե այն անցներ պրոֆեսիոնալների ձեռքի տակով։ Վստահաբար, այս որոշման հեղինակը ոչ միայն քաղաքից իսպառ անտեղյակ է, այլև քաղաքաշինության հետ հեռավոր առնչություն անգամ չունի, ասենք՝ իրավաբան է, դերասան, կոյուղագործ և զուտ ձեռքի տակ ունի ինչ-որ ժամանակ ինչ-որ անձի տրված՝ հողահատկացման որոշում։ Գործ ունենք անպատկերացնելի մի իրավիճակի հետ՝ մարդը սեփականատեր է, մի փոքր կտոր հող ունի, բայց՝ մեծ ախորժակ։ Նրա այդ մեծ ախորժակը ժամանակին, նախորդ իշխանությունները զսպել են, երբ վերջինս ցանկացել է սուպերմարկետ կառուցել գրեթե ճանապարհի վրա։

Հիմա, Երևանի քաղաքապետարանը ոչ գլխավոր ճարտարապետ ունի, Արթուր Մեսչյանի հրաժարականից հետո քաղաքապետը որոշեց, որ առանց ճարտարապետի էլ կարելի է յոլա գնալ։ Երևի ճարտարապետները իմքայլական ավագանիների մտքի թռիչքը զսպում էին․․․ ոչ էլ՝ Երևանի ավագանու քաղաքաշինության և հողօգտագործման հանձնաժողովի նախագահն է պրոֆեսիոնալ այսօր․․․դրա համար էլ՝ օդում շենք կառուցելու թույլտվություն է տրվել տվյալ կառուցապատողին։ Անպատկերացնելի է, ո՞նց կարող է բարձրահարկ շենք կառուցվել բանուկ ճանապարհի վրա, ճանապարհը՝ ակնհայտորեն զավթելով։

Մայթերից զուրկ այս ճանապարհի աջ և ձախ կողմերում բնակելի շենքեր են, ընդ որում՝ ձախակողմյան մասում 2000-ականների կեսերին կառուցված նորակառույցներ, քիչ ներքևում՝ նաև՝ նոր գցված հիմքեր, որ փաստում են՝ այս հատվածը երկկողմանի և մայթերով ճանապարհի պետք ունի, հիմա մարդիկ տրանսպորտից օգտվելու համար ուղղակի ստիպված են լինում ճանապարհի մեջ սպասել, ինչը վթարավտանգ իրավիճակ է ստեղծում։ Ավելին, այս ճանապարհը Լենինգրադյանը միացնում է Նոյ նորակառույց թաղամասին, այսինքն, ավտոմեքենաների երթուդարձը խիտ է և մշտական։

ՈՒ գիտե՞ք ո՞րն է տարօրինակը՝ ներկա իշխանությունը, Հայկ Մարությանից մինչև յուրաքանչյուր ավագանու անդամ՝ այն մարդիկ են եղել, որ քաղաքային միջավայրի աղավաղումներից են բարձրաձայնել շարունակ, մի ծառի համար կռիվ տվել, ապօրինի շինարարության համար՝ ակցիաներ արել․․․իսկ հիմա եկել ու օդում շենք կառուցելու թույլտվություն են տալի՞ս։ Ո՞վ չի հիշում, մեկ աղբյուրից գնումների դեմ և մրցույթների կազմակերպման ջատագով հանդես եկող ջահելներին, այդ թվում՝ զանազան՝ «ժողովրդավար» հ/կների անդամներ, որոնք իշխանության գալուց հետո՝ մրցույթները կամ իսպառ մերժում են, կամ էլ՝ ԽԾԲ ներգրավելով մեջ-մեջ անում՝ իշխանության կամոք։ Նույն կերպ՝ ինքնակամ կառույցների դեմ պայքարողները հիմա ապօրինություններն օրինականացնելու ճանապարհով են անտեսում քաղաքաշինական օրենքները։

Եթե անգամ փաստաթղթերով ճիշտ է ամեն բան, ուրեմն, տվյալ փաստաթղթերը կազմողներն են սխալ մասնագետներ․․․ Բայց արդյո՞ք ճիշտ է։

Հույս ունենք, որ Երևանի քաղաքապետարանի համապատասխան պաշտոնյաները, Երևանի քաղաքապետն անձամբ՝ տեղանքը զննելուց և խնդրին գլոբալ ծանոթանալուց հետո կվերանայեն այս փոքրիկ, ընդ որում, նաև ճանապարհից զավթված տարածքում բնակելի շենքի կառուցման թույլտվությունը։

Թե՞ քաղաքապետարանի գեոդեզիստներն են չափուձև արել ու ճանապարհի վրա կոորդինատները նշահարել․․․

Աղբյուր` Փաստինֆո