Փաստ ինֆո

Առաջիկա ընտրությունները լինելու են Նիկոլ-հականիկոլ պայքար, որը նաև ազգային-ազատագրական պայքարի էլեմենտներ է ունենալու, քանի որ հականիկոլական բոլոր ուժերի գաղափարախոսության հիմքում լինելու է պայքարն այսօրվա իշխանության չափից դուրս պրոթուրքական քաղաքականության դեմ: «Փաստինֆո»-ի հետ զրույցում նման տեսակետ է հայտնել քաղտեխնոլոգ Վիգեն Հակոբյանը՝ հավելելով, որ այս ընտրությունների հիմնասյուներից մեկը կարող է լինել նաև ազգային-ազատագրական պայքարի գաղափարը:

Հարցին՝ թե արդյո՞ք քաղաքացիները ձայն տալով Նիկոլ Փաշինյանին, չեն հաստատի, որ համակերպվել են պատերազմից հետո ստեղծված իրավիճակին և համաձայն են իշխանության վարած քաղաքականությանը, փորձագետը քիչ հավանական համարեց նման սցենար և ավելացրեց.

«Եթե ամեն դեպքում նման սցենար լինի, սա կնշանակի հայաստանցիները հաշտվել են Արցախի հանձնմանը, որ Հայաստանի տարածքի մի զգալի մասը ևս հանձնելու է Ադրբեջանին, որ Հայաստանը պետք է դառնա թուրքական վիլայեթ: Հասարակության այն հատվածը, որը շարունակում է աջակցել Նիկոլ Փաշինյանին, գուցե միշտ էլ երազել է , ինչպես իրենք են բնորոշում, որ Արցախի «բեռը» ի չիք դարձվի, և հիմա շատ ուրախ են որ այդպես ստացվեց, ուրախ են, որ միջանցքները բացելով, Հայաստանի տնտեսական միջավայրը այնքան է զարգանալու, որ իրենց սոցիալական վիճակը կտրուկ լավանալու է: Այսօր այդ զանգվածը որևէ առնչություն չունի այն զանգվածի հետ, որը ազգային խնդիր համարում է Արցախի վերադարձը և արժանապատիվ երկիր կառուցելը»,-ասաց Վիգեն Հակոբյանը:
Փորձագետի դիտարկմամբ՝ ներքաղաքական դաշտում առկա ներկայիս զարգացումները վկայում են, որ որեւէ քաղաքական ուժ առաջիկա հնարավոր ընտրություններում չի կարողանա ունենալ մեծամասնություն՝ 50+1, ու ձեւավորել կառավարություն, նոր կոալիցիան թերեւս անխուսափելի է

«Հաջորդ իշխանությունը լինելու է կոալիցիոն, նույնիսկ ստիպված է լինելու, որովհետև այս պահի դրությամբ դեռևս չի երևում բացարձակ լիդեր, որը կկարողանա միայնակ կառավարություն ձևավորել»,-ընդգծեց զրուցակիցը:
Անդրադառնալով խորհրդարանական ընդդիմության քայլերին՝ քաղտեխնոլոգը նկատել է, որ օրինակ ԼՀԿ-ն մշտապես ունի անկանխատեսելիություն և հաճախ է ընդունում իրավիճակային որոշումներ.
«Հիշում եք, ասում էին, որ պահանջելու են ընտրությունները հունիսի 1-ից ուշ չանցկացվեն, իրենց խոսքով՝ հունիսի 1-ից ուշ եթե ընտրություններ լինեն, երկիրը կկործանվի: Ասում էին, եթե Օնիկ Գասպարյանին հեռացնեն, ընտրությունների չենք գնա, բայց վերջում գնացին, ասելով, որ համաձայնվել են, որպեսզի երկիրը վերջնականապես կոլապսի չգնա»,-ասաց Հակոբյանը՝ նշելով, որ ԲՀԿ-ի դեպքում իրավիճակն ավելի բարդ է.

«ԲՀԿ-ն չնայած միասնական ընդդիմության անդամ էր, սակայն իր գիծը՝ բանակցությունների գնալու և առանց նախապայմանների ընտրությունների գնալու, չի համընկել միասնական ընդդիմության քաղաքական գծի հետ, ԲՀԿ-ն վերջին ամիսներին իր քաղաքական գիծը սեփական ծրագրեր իրականացնելուն էր ուղղված, քան քաղաքական գիծը պահպանելու վրա»,-ասաց Վիգեն Հակոբյանը:
Այդուհանդերձ, ընտրությունների միջոցով իշխանափոխություն իրականացնելու հավանականությունը, փորձագետը հավանական է համարում։

«Եթե քաղաքական ընդդիմությանը հաջողվի իր ձայները ստանալ, և հիմնական ընդդիմադիր ուժերին հաջողվի կոալիցիա ստեղծել, ապա նրանք կկարողանան ապահովել կառավարություն ձևավորելու իրավունք, և ինչու ոչ՝ ձևավորել իշխանություն»,-ասաց Հակոբյանը:
Քաղտեխնոլոգի համոզմամբ՝ Նիկոլ Փաշինյանը չունի բավարար ձայներ, որպեսզի կարողանա հաղթել ընտրություններում.
«Առանց սարսափելի ծավալների խախտումների հնարավոր չէ, որ Փաշինյանի քաղաքական ուժը միանգամից ապահովի մեծամասնություն խորհրդարանում»:

Փորձագետը միևնույն ժամանակ նկատում է, որ Նիկոլ Փաշինյանը չի կարողանա այդ աստիճան կեղծել ընտրությունները .
«Այս իշխանությունն այնքան թույլ է, որ կեղծել էլ չի կարողանա։ Ընտրություններ կեղծել, վարչական ռեսուրս կիրառելն էլ ունակություն է»,-մեզ հետ զրույցում ասաց Վիգեն Հակոբյանը:

Աղբյուր` Փաստինֆո