Փաստ ինֆո

Երևանի ընդհանուր իրավասության դատարանի դատավոր Աննա Դանիբեկյանի քթի վիրահատության վերաբերյալ քրեական գործի շրջանակներում Նարեկ Մանթաշյանին մեղադրանք է առաջադրվել ՀՀ քրեական օրենսգրքի 144-րդ հոդվածի ՝ մարդու անձնական կամ ընտանեկան գաղտնիք համարվող տեղեկություններն առանց նրա համաձայնության օգտագործելու, հրապարակելու հատկանիշներով։ Նրա նկատմամբ որպես խափանման միջոց է կիրառվել ստորագրությունը՝ չհեռանալու մասին։

Նարեկ Մանթաշյանը «Փաստինֆո»-ի հետ զրույցում նշեց, որ չի ընդունում առաջադրված մեղադրանքը՝ այն գնահատելով անլուրջ է և քաղաքական։ Նշենք, որ քրեական գործով վարույթը կասեցվել էր, ինչից հետո քննիչը փոխվել է։ Մանթաշյանը նշեց, որ քննիչի փոփոխությունից հետո երեք անգամ հրավիրվել է հարցաքննության։ Քրեական գործի շրջանակներում վարույթն իրականացնող մարմինը հետազոտել է Մանթաշյանի հեռախոսը, գտել էլեկտրոնային հասցեն, որից ստացվել էր Դանիբեկյանի քթի վիրահատության վերաբերյալ տեղեկությունը։

Մանթաշյանի փոխանցմամբ՝ հաստատվել է իրենց հայտնած տեղեկությունը, որ Դանիբեկյանը քիթը վիրահատել է պետպատվերի շրջանակներում ։

Հատկանշական է, որ քրեական գործով որպես վկա է ներգրավվել փաստաբան Ալեքսանդր Կոչուբաևը, որն իրականացնում էր Նարեկ Մանթաշյանի պաշտպանությունը, ընդ որում՝ փաստաբան Կոչուբաևը «Փաստինֆո»-ի հետ զրույցում պատմեց, որ այդ օրը հարցաքննության էր հրավիրված Նարեկ Մանթաշյանը և ինքը ներկայացել էր նախաքննական մարմին՝ որպես փաստաբան, ծանուցված չի եղել որպես վկա հրավիրվելու համար։ Նրա խոսքով՝ քրեական դատավարությունում առանձնահատկություն կա այն առումով, որ վկա ներգրավվելու դեպքում ցուցմունք տալուց հրաժարվելը քրեական պատասխանատվության է հանգեցնում։

«Ես՝ որպես վկա չէի կարող հրաժարվել ցուցմունք տալուց, ընդ որում՝ հարցերի շրջանակն այնպիսին էր, որ ես որպես փաստաբան երաշխավորված չէի, այսինքն՝ տեղեկություններն ինձ հայտնի չէին դարձել՝ որպես փաստաբան իմ գործունեության ընթացքում»,- նշեց նա՝ հավելելով, որ իրեն որպես վկա են ներգրավել և ինքն այլևս չի կարող Նարեկ Մանթաշյանի պաշտպանությունն իրականացնել։

Կոչուբաևը հարցաքննվել է որպես վկա, սակայն կասկածանքի շուրջ։

«Կարծում եմ՝ իրենք զուտ վախեցել են աղմուկից, որ փաստաբանին որպես կասկածյալ ներգրավեն կամ կասկածվող վկայի ռեժիմով լսեն։ Համենայն դեպս՝ որպես վկա եմ հարցաքննվել, բայց հարցերը բնույթով այնպիսին էին, որոնք ուղղված են եղել մեղադրյալ Մանթաշյանին։ Կարելի է եզրակացնել, որ ըստ էության ես կասկածանքի շուրջ եմ հարցաքննվել»,- նշեց փաստաբանը՝ հավելելով, որ այդ հարցադրումներից հետո Մանթաշյանին վկայի կարգավիճակից տրվել է մեղադրյալի կարգավիճակ, իսկ իր դեպքում կաշկանդված են եղել աղմուկից, սակայն փաստաբանին վկայի կարգավիճակ տալով՝ զրկել են անձին պաշտպանելու իրավունքից։ Ամեն դեպքում՝ քրեական գործով կներգրավվի այլ փաստաբան, որը կօգնի Մանթաշյանին պաշտպանվել մեղադրանքից, իսկ Կոչուբաևին՝ մեղադրյալի կարգավիճակում չհայտնվելուց։

Հիշեցնենք, որ դեռևս նախորդ տարվա ընթացքում դատավորի՝ քթի վիրահատության մասին հրապարակումների առնչությամբ նախապատրաստված նյութերով ոստիկանությունում հարուցվել է քրեական գործ՝ ՀՀ քրեական օրենսգրքի 144-րդ հոդվածի և 145-րդ հոդվածի հատկանիշներով՝ մարդու անձնական կամ ընտանեկան գաղտնիք համարվող տեղեկություններն առանց նրա համաձայնության օգտագործելու , բժշկական գաղտնիք հանդիսացող տվյալներ հրապարակելու համար։ Դանիբեկյանի քթի վիրահատության վերաբերյալ լուրերը տարածվել էին՝ կապված ՀՀ երկրորդ նախագահ Ռոբերտ Քոչարյանի և մյուսների գործով դատական նիստերի ձգձգման հետ։ Խնդիրն այն էր, որ ՀՀ երկրորդ նախագահի և մյուսների գործով 2020թ մարտի 17-ին նշանակված դատական նիստը չէր կայացել, թեեւ մինչ այդ դատավոր Աննա Դանիբեկյանի աշխատակազմից տեղեկացրել էին, որ այն կայանալու է ու պաշտպանական կողմը մարտի 16-ին ներկայացրել էր ՀՀ երկրորդ նախագահի խափանման միջոցը փոխելու մասին միջնորդությունը։

Դատական նիստի հետաձգումը պատճառաբանվել էր դատավորի վատառողջ լինելու հանգամանքով, սակայն հետագայում պարզվեց, որ նա ներկայացրել է անաշխատունակության թերթիկ ՝ դեռեւս մարտի 13-ի ամսաթվով։ Ավելի ուշ՝ ապրիլի 9-ին մամուլում տեղեկություն հայտնվեց, որ Աննա Դանիբեկյանը պետպատվերի շրջանակներում վիրահատել է քիթը։

Հեղինակ՝ Իզաբել Սահակյան

Աղբյուր` Փաստինֆո