Փաստ ինֆո

Թուրքական շատ ապրանքներ կարող են գալ Վրաստան, վերափաթեթավորվել, տարրաների վրա վրացական անուններ գրվեն, և քանի որ Հայաստանը Վրաստանի հետ ունի ազատ առևտրի համաձայնագիր, այդ ապրանքները հանգիստ կարող են մտնել Հայաստան: Այս մասին Ազգային ժողովում ճեպազրույցի ժամանակ ասաց ԲՀԿ-ական պատգամավոր Միքայել Մելքումյանը՝ անդրադառնալով ՀՀ էկոնոմիկայի նախարարի տեղակալ Վարոս Սիմոնյանի հայտարարությանը, որ հունվարի 1-ից սկսած Թուրքիայից Հայաստան որևէ տեսակի գյուղատնտեսական ապրանք չի ներմուծվում:

Դիտարկմանը, որ երեկ ամբողջ համացանցը քննարկում էր Գագիկ Ծառուկյանի որդու հարսանիքը, Մելքումյանը նշեց, որ դա անձնական միջոցառում է և կենտրոնանալ ընտանիքի անձնական միջոցառման վրա տեղին չէ.

«Ավելի լավ է մեր ազգը կենտրոնանա այն խնդիրների վրա, որը համազգային բնույթ ունի: Կարծում եմ՝ անձնական է, հնարավոր է՝ նախընտրական բնույթ ունի, մեկ այլ պարագայում, կարող է ոչ էլ կենտրոնանային դրա վրա: Եթե չլիներ նախընտրական փուլ, որը մոտենում է, միգուցե այսպիսի արձագանք չլիներ, ընկալվեր սովորական, բայց իրենց գործն է, համացանցում ինչ ասես, որ չի լինում: Միգուցե ԲՀԿ-ն հայտ է ներկայացրել, որ լայն թափով գնում է դեպի ընտրություններ, դրա համար են այդպիսի արձագանքներ լինում»,-պարզաբանեց ԲՀԿ-ական պատգամավորը:

Մելքումյանի խոսքով՝ Հայաստանում նախորդ 30 տարվա ընթացքում խորհրդարանական ընտրությունների միջոցով իշխանություն երբեք չի փոխվել, սակայն հիմա իրական շանսեր կան ընտրությունների միջոցով իշխանափոխություն անել.

«Ես կարծում եմ, որ ընտրության արդյունքները պետք է լինեն խիստ բալանսավորված, 50+1% ոչ մեկ չի կարող հավաքել: Այս պահին հաշվի առնելով մեր քաղաքական ուժի հետագիծը՝ հիմա մեր հերթն է, մենք գալիս ենք իշխանությունը վերցնելու, Գագիկ Ծառուկյանը պետք է դառնա պետության ղեկավար»,- ասաց Միքայել Մելքումյանը:

Աղբյուր` Փաստինֆո