Փաստ ինֆո

Ուրբաթ օրը՝ 2021թ․ ապրիլի 9-ին «Ընթերցանության մարաթոն» էր Հայաստանի բոլոր 5 Ամերիկյան անկյուններում։ Այն կազմակերպվել էր  ԱՄՆ և ՀՀ ազգային գրադարանային շաբաթների շրջանակում։ Մարաթոնային ընթերցանության համար ընտրվել էր ամերիկացի գրող Ռ․Ջ․ Պալացիոյի «Հրաշքը» վեպը, որն ընթերցողին սովորեցնում է հարգել ու արժևորել դիմացինին և, արտաքին տարբերությունները մի կողմ թողնելով, գնահատել այն, ինչ միավորում է մեզ բոլորիս որպես բանական էակների։  

Մարաթոնին մասնակցեցին դեսպան Թրեյսին, Երևանի փոխքաղաքապետ Գայանե Մելքոմ Մելքոմյանը, ամերիկացի դիվանագետներ, քաղաքապետարանի աշխատակիցներ, մանկավարժներ, գրական գործիչներ, գրադարանավարներ և ընթերցասերներ։ Մասնակիցներից յուրաքանչյուրը շուրջ 5 րոպե բարձրաձայն ընթերցում էր գրքի հերթական հատվածը՝ հայերենով կամ անգլերենով, իսկ ընթերցանության ողջ ընթացքը ուղիղ հեռարձակվում էր Երևանի Ամերիկյան անկյան ֆեյսբուքյան էջում։  

Դեսպան Թրեյսին գրքի մասին խոսելիս նշեց․ «Այս պատմությունը թե՛ երեխաներին, թե՛ մեծերին սովորեցնում է, որ բոլորն արժանի են հարգալից ու բարեհաճ վերաբերմունքի։ Այն նաև ի ցույց է դնում տոկունությունն ու դրա տված պտուղները․․․ Մենք տարբեր միջավայրերում ենք մեծացել, տարբեր լեզուներով ենք խոսում, արտաքինից նման չենք իրար, սակայն եթե կարողանանք ընդունել ու արժևորել այդ տարբերությունները, մենք կարող ենք առավել արդյունավետ աշխատել միմյանց հետ, ինչը շահեկան կլինի բոլորիս համար»։   

«Հրաշքը» վեպի հերոս Օգյուստ (Օգգի) Փուլմանն ի ծնե առողջական խնդիրներ է ունեցել,  որի պատճառով նրա դեմքը խեղված է։ Արտասովոր արտաքինի պատճառով նա դպրոց չի հաճախում ու սովորում է տնային պայմաններում, բայց ի վերջո նա սկսում է հաճախել դպրոց, որի մասին էլ հենց պատմում է գիրքը։ Օգգին առաջին անգամ դպրոց է գնում 5-րդ դասարանում և ցանկանում է, որ իրեն պարզապես վերաբերեն ինչպես մի սովորական երեխայի։ Իսկ նրա համադասարանցիների համար անչափ դժվար է նրա մեջ արտառոց դեմքից զատ որևէ այլ բան նկատել։ Գիրքը նկարագրում է, թե նրա շրջապատի մարդիկ ինչպես են համակերպվում տարբերություններին։ Գիրքն ի վերջո ապրումակցման, ըմբռնումի ու բարության դաս է բոլորիս համար։ «Հրաշքը» վեպն արժանացել է բազմաթիվ ազգային ու միջազգային մրցանակների, իսկ 2017թ․ գրքի հիման վրա ֆիլմ է նկարահանվել։ Այս գիրքը 2014թ․ ԱՄՆ դեսպանության աջակցությամբ թարգմանվել է հայերեն։  

Մինչ Երևանի Ամերիկյան անկյունում մասնակիցները ընթերցում էին գիրքը, Հայաստանի մյուս 4 Ամերիկյան անկյունները (Գյումրի, Վանաձոր, Կապան և Չարենցավան), ինչպես նաև Հայաստանի մարզային գրադարանները տեսակապի միջոցով հետևում էին ընթացքին՝ ներգրավելով իրենց ընթերցողներին։ 

Հայաստանի Ամերիկյան անկյունները ողջ տարվա ընթացքում կարևոր աշխատանք են իրականցնում անգլիալեզու գրականության մատուցման հարցում։ Համավարակի պայմաններում ծրագրերի շարունակականությունը ապահովելու համար 2020թ․ Ամերիկյան անկյուններն իրենց խմբակներն ու դասընթացները սկսեցին կազմակերպել առցանց։ Կազմակերպվել են անգլերենի, համակարգչային ծրագրավորման, եռաչափ տպագրության անվճար դասընթացներ։ Ամերիկյան անկյուններում նաև առկա են գրքեր, ամսագրեր, տեսասկավառակներ, որոնք հիմնականում Միացյալ Նահանգների մասին են։ Ամերիկյան անկյունները բաց են բոլորի համար։ Ամերիկյան անկյունների մասին ավելին իմանալու համար տես՝ https://www.americancorners.am/։ 

Աղբյուր` Փաստինֆո