Փաստ ինֆո

Իրականում գերիների վերադարձի վերաբերյալ պայմանավորվածություն չի եղել, մենք ուղղակի հույս ենք ունեցել, որ այդ թռիչքը իր հետ լավ լուր կբերի: «Ազատության» ռադիոկայանի եթերում հայտարարել է ԱԺ փոխնախագահ Ալեն Սիմոնյանը.

«Պայմանավորվածություններ չեն եղել, մենք ուղղակի հույս ենք ունեցել, ինչպես ամեն օր, որ այդ թռիչքը իր հետ լավ լուր կբերի, այս ամենը տեղեկատվական այս իրավիճակում բավականին մեծ արձագանք ու դժգոհություն է առաջացրել, որը ընդունելի է, բայց բարձրաստիճան որևէ պաշտոնյա նման հայտարարություն չի արել, այնուամենայնիվ ես համարում եմ, որ նման ապատեղեկատվության համար պետք է ներողություն խնդրենք մեր համաքաղաքացիներից և ծնողներից»,- ասաց Սիմոնյանը:

Վերջինս պնդեց, թե ո՛չ Անդրանիկ Քոչարյանը, ո՛չ Մանե Գևորգյանը գերիների վերադարձի մասին լուրերը չեն հաստատել:

Մինչդեռ նշենք, որ ԱԺ-ում այսօր Անդրանիկ Քոչարյանը հայտարարել է, թե Մուրադովը գնացել էր, որ գերիներին Հայաստան ուղեկցեր։ Ավելին, երեկ՝ ապրիլի 8-ին, երբ ինքնաթիռն արդեն ՀՀ օդային տարածքում էր, Նիկոլ Փաշինյանի մամուլի քարտուղարը հայտարարել էր, թե գերիների հերթական խումբն է տեղափոխվում Հայաստան։ Իսկ ինքնաթիռի ժամանումից հետո, երբ պարզ դարձավ, որ որեւէ ռազմագերի չի վերադարձել, փոխվարչապետ Տիգրան Ավինյանի գրասենյակը հայտարարություն տարածեց, թե «Գերիների հետ վերադարձը, ցավոք, կրկին հետաձգվում է, քանի որ հակառակորդի կողմից նոյեմբերի 9-ի եռակողմ հայտարարության 8-րդ կետը ի կատար չի ածվում, ինչը հետպատերազմական մարդասիրական գործընթացի կոպիտ խախտում է»։

Արձագանքելով ռուս խաղաղապահների հրամանատար, գեներալ-լեյտենանտ Ռուստամ Մուրադովի հայտարարությանը, որ ի սկզբանե գերիներին վերադարձնելու պայմանավորվածություն չի եղել, պաշտոնյաները հանրությանը թյուրիմացության մեջ են գցել՝ ԱԺ փոխխոսնակը ասաց.

«Որևիցե տրամաբանություն նույն Մուրադովի աշխատանքի ընթացքում գերիների վերադարձի և քանակի պարագայում ոչ կա, ոչ էլ կարող է լինել ,ուստի ինչ-որ հղումներ անել այս կամ այն պաշտոնյայի վրա, կամ իրավիճակի վրա ճիշտ չէ»:

Աղբյուր` Փաստինֆո