Փաստ ինֆո

ԱԺ անկախ պատգամավոր Սոֆյա Հովսեփյանը հեռախոսազանգ է ունեցել ՊՆ նախարարի տեղակալի հետ, ներկայացրել գերեվարված և անհետ կորած զինծառայողների՝ ՊՆ շենքի մոտ հավաքված ծնողների պահանջները, ինչից հետո նախարարությունից առաջարկել է եղել հանդիպում ծնողների հետ՝ 10-10 խմբերով: Ծնողները չեն համաձայնել՝ նշելով, որ հանդիպում պետք է լինի բոլոր 50-60 ծնողների հետ, նաև առաջարկել են, որ նախարարը դուրս գա շենքից և հանդիպում ունենա: Սոֆյա Հովսեփյանը լրագրողների հետ զրույցում նշեց, որ հետո արդեն ոստիկանապետն է եկել և ներս մտել, որ բանակցությունները այլ ձևաչափով սահմանեն:

Հարցին՝ ինչ կաշկանդվածություն ունի ՊՆ նախարարը, Հովսեփյանը նշեց, որ նախարարի կաշկանդվածության մասին պետք է հարցնել՝ իրեն տեսնելիս, քանի որ ինքը որևէ կաշկանդվածություն չի զգացել՝ առավոտվանից այդտեղ լինելով:

Ինչ վերաբերում է Մուրադովի հայտարարությանը, որ գերիների վերադարձի լուրերը պաշտոնյաների մանիպուլյացիան էր և նման քննարկում տեղի չի էլ ունեցել, Հովսեփյանը նշեց, որ պետք է պատասխանի կառավարությունը: Ավելին՝ երեկ ինքը խոսել է վերջիններիս հետ և իրենք զարմացել են, որ նման ինֆորմացիա է տարածվում, մասնավորապես, որ գերիներին պետք է տեղափոխեր Մուրադովը, ով տեղյակ չէր այդ մասին և միևնույն ժամանակ զարմացած էր, թե ինչու էր կառավարությունից դուրս եկել այդ ինֆորմացիան և պատգամավորի միջոցով տարածվել: Ավելին՝ երեկ Սոֆյա Հովսեփյանը տեղեկություն էր հայտնել, որ գերիների վերադարձ չի նախատեսվում, մինչդեռ՝ ծնողները չեն հավատացել և գնացել են օդանավակայան:

Անդրադառնալով Շիրակի մարզում տիրող իրավիճակին՝ Հովսեփյանը տեղեկացրեց, որ ամբողջ Շիրակի մարզը պարալիզացված է, գերեվարված զինծառայողների ծնողները պահանջում են հանդիպում՝ Նիկոլ Փաշինյանի հետ, իսկ այժմ նախատեսված է հանդիպում՝ ԱԱԾ տնօրենի հետ:

Նրա խոսքով՝ ծնողները բավականին գիտակցված են մոտենում հարցին և եթե երեկ այդ խաբկանքը, կեղծիքը չլիներ, այսօր դժվար թե փողոցներ փակվեին, այսօր մարդիկ անելանելի վիճակից այդ ծայրահեղ քայլին են դիմում:

Աղբյուր` Փաստինֆո