Փաստ ինֆո

Մենք շարունակելու ենք գերիներին հետ վերադարձնելու գործընթացը։ ԱԺ-ում լրագրողների հետ ճեպազրույցի ժամանակ այս մասին ասաց ԱԺ պաշտպանության և անվտանգության հարցերի հանձնաժողովի նախագահ Անդրանիկ Քոչարյանը։ 

Պատգամավորը նշեց, որ գերիների հարցով տեսանելի և անտեսանելի գործընթացներ կան. «Գնում են, բանակցում են, եկեղեցին էլ կարող է դեր խաղալ, Հանրապետության նախագահի կապերն էլ կարող են դեր խաղալ, բայց դրանք չերևացող գործընթացներ են։ Հակառակորդի հետ այնպես պետք է խոսենք, որ հակառակորդը խաղացնելու այլ հնարավորությունից զրկված լինի։ Գերիների վերադարձի հարցը տեղի ունեցավ ՀՀ վարչապետի և ՌԴ նախագահի հանդիպումից հետո։ Դա քայլ էր, որտեղ հստակ երևաց, որ Ռուսաստանը փորձել է իր մասնակցությունը ներդնի խնդրի լուծման համար։ Դրանով է պայմանավորված, որ Ռուստամ Մուրադովը գնացել էր գերիներին Հայաստան ուղեկցեր։ Ինչ-որ խոչընդոտ եղավ, որի պատճառը դեռ չեմ կարող հնչեցնել»,-ասաց Անդրանիկ Քոչարյանը։

Դիտարկմանը, որ Ադրբեջանի ԱԳ նախարարը հայտարարում է, որ գերիների թեման փակված է, Անդրանիկ Քոչարյանն ասաց. «Կարծեմ արտգործնախարարը մինչև այդ պաշտոնում պաշտոնավարելը կրթության նախարար է եղել, չեմ կարծում, որ իր ասածները բխում են այդ իրողություններից։ Իրենք ասում են, որ հրադադարից հետո Գյումրիի աշխարհազորայինները, որոնք հայտնվել են իրենց տնօրինման տակ, նրանց չեն դիտում որպես ռազմագերի, դիտում են որպես ահաբեկիչներ։ Հիմա պետք է նրանց բացատրել, թե այդ խնդիրն ինչպես է առաջացել։ Դա իրենց ճաշակով չպետք է թելադրվի, այլ իրավական խնդիրների տրամաբանությամբ։ Երբ ինքնաթիռը Մուրադովի ներկայությամբ գնացել է այնտեղ, նա գնացել է պայմանավորվածություններն ի կատար ածելու ճանապարհով»,-ասաց Անդրանիկ Քոչարյանը։

Հարցին՝ գերիների հարցը կլուծվի՞, Անդրանիկ Քոչարյանն ասաց, որ չի կարող չլուծվի, սակայն ժամկետներ չնշեց՝ ասելով, որ դա աշխատանք է, որը պետության առաջնահերթ պարտավորություն է։

Աղբյուր` Փաստինֆո